Ethet e rikonstruimit kanë kapluar ekzekutivin, ndërsa po ziejnë prapaskenat e bisedimeve mes partnerëve të koalicionit – VMRO-DPMNE, VLEN dhe ZNAM.
Siç mëson Agjencia e kajneve INA, në tryezën e bisedimeve dhe pazareve për t’u këmbyer janë këto dikastere ministrore.
MINISTRIA E DREJTËSISË
MINISTRIA E SHËNDETËSISË
MINISTRIA E ARSIMIT
MINISTRIA E KULTURËS
MINISTRIA PËR INTEGRIME EVROPIANE
MINISTRIA E PUNËS DHE POLITIKËS SOCIALE, DEMOGRAFISË
MINISTRIA E SPORTIT DHE RINISË
MINISTRIA PËR MARRËDHËNIE NDËRETNIKE
ZËVENDËSKRYEMINISTRI PËR QEVERISJE TË MIRË
Burime nga negociatat mes partnerëve informojnë për INA se është mëse e qartë se ministri aktual i Drejtësisë, Igor Filkov do të largohet dhe se ky post po kërkohet nga VLEN, por insistim ndaj këtij resori po bën edhe VMRO-DPMNE, për shkak të reformave që po kërkon BE.
ZNAM-it i është bërë e qartë në sy se ky dikaster është tejet “problematik” për ta dhe se kjo parti ka marrë pushtet shumë më tepër sesa “peshon” realisht në terren. ZNAM ka rënë në panik dhe nuk di si të veprojë: po kapen pas marrëveshjes fillestare 4-vjeçare, por kryeministri Hristijan Mickoski po i mban në “gjemba”, duke mos u kthyer asnjë përgjigje nëse do të mbeten vetëm me një ministri apo nëse vendi po shkon drejt zgjedhjeve të parakohshme.
Ndërsa SHËNDETËSIA ka ndezur gjakrat mes VMRO-DPMNE-së dhe koalicionit VLEN. Partia e Mickoskit insiston me çdo kusht të marrë Shëndetësinë, duke u ofruar VLEN-it si ofertë: MINISTRINË E KULTURËS, MINISTRINË E BUJQËSISË OSE MINISTRINË E SPORTIT.
Por nga ana tjetër, VLEN për të lëshuar SHËNDETËSINË, në këmbim kërkon MINISTRINË E ARSIMIT.
Ndërkohë, MINISTRIA E PUNËS DHE POLITIKËS SOCIALE që deri tani udhëhiqet nga Fatmir Limani pritet t’i takoj ose VLEN ose VMRO-DPMNE-së. VLEN po insiston që këtë dikaster ta ndryshoj me ndonjë nga dikasteret tjera ministrore ose edhe ta mbaj me ndonjë kuadër tjetër. VLEN po ashtu ka në tryezë edhe MINISTRINË PËR MARRËDHËNIE MIDIS BASHKËSIVE ETNIKE që udhëhiqet nga Ivan Stoilkoviq. Siç bëhet e ditur Stoilkoviq po paketon valixhet për t’u larguar nga Qeveria. Por, posti i tij mund të merrret edhe nga Partia Demokratike e Turqve e deputetit Bejxhan Ijas, që ishte pjesë e Frontit Evropian të prirë nga BDI.
Kryeministri Mickoski ka konfirmuar publikisht se “pazari” është në fazën përmbyllëse dhe se gjithçka do të pritet me thikë gjatë fundjavës.(INA)