Mazhoranca dhe opozita u përplasën sot në parlament për ritmin e procesit të anëtarësimit të Shqipërisë në Bashkimin Europian. Kryetari i Partisë Demokratike Sali Berisha akuzoi qeverinë se ka bllokuar procesin, duke sjellë në vëmendje se një ditë më parë Mali i Zi nisi punën për hartimin e traktatit të anëtarësimit, në një kohë që Shqipëria ende nuk ia ka dalë të miratojë raportin e piketave të ndërmjetme.
Por kreu i grupit parlamentar socialist Taulant Balla premtoi sërish se brenda vitit 2030 Shqipëria do të jetë pjesë e BE.
“Ju e morët vesh çfarë deklaroi komisionerja dje. Përgëzoi Malin e Zi që filloi hartimin e traktatit dhe vazhdoi me një frazë pa cituar Shqipërinë, lufta kundër korrupsionit dhe shteti ligjor, vetëkuptohej Shqipëria, mbetet në themelet e këtij procesi”, tha Berisha.
“Ka një procedurë që të gjithë e dimë që nga KE kalon të Këshilli dhe nga Këshilli të vendet anëtare. Brenda fillimit të qershorit, sikurse u komunikua nga Kos dhe Kallas, se pritshmëria e Shqipërisë për të përmbyllur procesin e anëtarësimit brenda 2030-ës është realiste, madje po citoj Kallas që tha se Shqipëria bashkë me Malin e Zi duhet të bëhen gati për të marrë pjesë në zgjedhjet europiane të vitit 2029″, u shpreh Balla.
Sipas Berishës dosja për ish-zëvendëskryeministren Balluku dhe dosja e AKSHI-t janë dy çështjet që ndikojnë në procesin e anëtarësimit në BE.
“Procesi i integrimit është për momentin heqja menjëherë e imunitetit të Lubi Ballukut dhe dërgimi i saj atje ku kërkon Spaku. Është paraqitja para Skapit e Linda Ramës, arkitektes së vërtetë të kopshtit privat të Edi Ramës. Dosja e AKSHI-t dhe e Lubisë janë dosje evropiane dhe botërore”, tha Berisha.
“Hiqni dorë nga kjo baltë që hidhni kundër Shqipërisë, nuk e keni Shqipërinë vend armik. Nuk ju zgjedhim dot, por është momenti të punojmë bashkë. Nuk iu bën nder të shani nga mëngjesi në darkë”, deklaroi Balla.
Shqipëria sot pret ende vlerësimin e vendeve anëtare të BE për raportin e piketave të ndërmjetme, vetëm pasi të miratohet ky raport nga BE, atëherë vendi ynë mund të nisë procesin e mbylljes së kapitujve.