Kryeministri Edi Rama zhvilloi sot një takim me kryetarët e bashkive, ku në fokus ishte procesi i legalizimeve dhe përmirësimi i shërbimeve për qytetarët.
Gjatë fjalës së tij, Rama theksoi nevojën që bashkitë të bashkëpunojnë më ngushtë me kadastrën për hartimin e planeve prioritare të legalizimit dhe përcaktimin e zonave ku duhet ndërhyrë me urgjencë.
Ai kërkoi që procesi të bëhet më i drejtë dhe më transparent, duke vendosur një sistem ku përparësi të kenë qytetarët që kanë aplikuar më herët, ndërsa komunitetet të informohen sipas zonave përkatëse.
Një nga propozimet kryesore ishte hapja e zyrave të posaçme të ndihmës juridike pranë bashkive, të cilat do të asistojnë qytetarët në aplikimet për legalizim.
“Kadastra, në bashkëpunim me çdo bashki, por këtu duhet angazhimi juaj, të ndërtojë planet prioritare të legalizimit. Në mënyrë që të legalizojmë procesin dhe ta bëjmë më të drejtë e transparent për aplikuesit duke vendosur një sistem ku ata që kanë aplikuar më parë janë të parët për të marrë përgjigje, po ashtu përcaktimi i zonave prioritare. Të kemi një punë të përbashkët dhe të koordinuar më të mirë. Duhet patjetër që bashkitë të hapin një zyrë të ndihmës juridike për kadastrën. Ka shumë ankesa për kadastrën, por shumë prej tyre vijnë nga moskryerja e aplikimit në mënyrë të rregullt ligjore. Nuk ka asnjë problem që bashkitë të hapin një zyrë të ndihmës juridike enkas për shërbimin e kadastrës dhe legalizimeve. Është diçka që do të lehtësojë maksimalisht qytetarët në mënyrën e kuptimit sesi bëhet një legalizim. Këtë do ta ndjekë ministri i Pushtetit Vendor”, tha Rama.