Nisma e kryetarit të Gjykatës së Lartë, Sokol Sadushi, për të rishikuar mënyrën e dhënies së masave të sigurisë ishte një tjetër pikë debati këtë të enjte në studion e “Quo Vadis” të moderatores Pranvera Borakaj në Vizion Plus.
Analisti Agim Baçi tha se kjo është një nismë e mirë, pasi shoqëria shqiptare, para se të shkojë në masa ekstreme, duhet fillimisht të këshillohet.
Pjesë nga biseda:
Baçi: Ne si shoqëri vijmë nga një kulturë ku nuk këshillojmë, por vëmë gjobë, fusim në burg. Nuk është qëllimi të dënojmë, qëllimi është të japim drejtësi. Për të ruajtur një rast nuk shkohet menjëherë në masa ekstreme.
Myftari: Këto masa ekstreme represive që janë të shumta, si ka mundësi që ka ende krim?
Kume: Politikat represive nuk kanë dhënë efekt.
Baçi: Konceptin e rehabilitimit ne e kemi zero. Ne jemi një shoqëri që nuk rehabiliton.
Myftari: Duan vetëm të merren me krim.
Kume: Shoqëria edukohet.
Myftari: Si? Ka një model edukimi, nëpërmjet vuajtjes.