Gazetari Endri Xhafo ka ngritur pikëpyetje mbi qëllimin e protestave të organizuara nga Partia Demokratike, duke theksuar se mbetet e paqartë se çfarë kërkon konkretisht opozita.
I ftuar në studion e QUO VADIS në Vizion Plus ai tha se përmes këtyre protestave, Berisha synon më shumë të përballet me një “indiferencë ndërkombëtare”, në një kohë kur, sipas tij, kryeministri Edi Rama ka qenë i suksesshëm në marrëdhëniet me faktorët ndërkombëtarë.
Megjithatë, ai shprehet skeptik se protestat mund të sjellin ndryshime konkrete, duke theksuar se Partia Socialiste zotëron 83 vota. Sipas tij, objektivi kryesor i PD-së është të mbajë të mobilizuar mbështetësit dhe të tregojë prezencë përmes protestave.
Xhafo paralajmëron edhe një “efekt pervers”, pasi, sipas tij, këto lëvizje shmangin analizën e brendshme të partisë.
Ai shton se mungesa e një mase të gjerë protestuesish mbetet një problem për opozitën.
“Cili është objektivi i një proteste? Unë nuk e di çfarë kërkon PD-ja. Por Berisha tha pas protestës: “E arritëm atë që donim, e kemi në të gjitha mediat ndërkombëtare.” Unë nuk mendoj se Berisha, përmes këtyre protestave, vetë përmbush qëllimin e tij. Ai kërkon që, përballë një indiference ndërkombëtare, të krijojë një tjetër situatë, pasi Edi Rama ka qenë i zoti në marrëdhëniet me ndërkombëtarët. A është kjo e rëndësishme për të arritur atë që ai do? Unë dyshoj që mund të ndodhë, pasi PS ka 83 vota. Por Partia Demokratike synon të mbajë të karikuar mbështetësit e vet, të tregojë që bën protesta. Nga ana tjetër, ka edhe një efekt pervers. Ky efekt është se nuk bëhet analiza e brendshme. Nuk ka në Shqipëri protestues të mjaftueshëm. Më vjen çudi ta shoh doktorin me maskën. Narrativa e Trump dhe LaCivita ra. Duke takuar Rama Trump-in, duke shkuar në Shtëpinë e Bardhë, ata mbetën tek Gjermania, ndaj morën flamujt në protestë. Kjo edhe për faktin se Gjermania reagoi për çështjen Balluku”, tha gazetari Xhafo.
/vizionplus.tv