PD do të shkojë më 23 maj në zgjedhje të brendshme për të zgjedhur kryetarin e partisë. Por sa e mundur do të jetë që dikush të fitojë përballë Sali Berishës?
Kjo ishte një nga pikat që u diskutua këtë të enjte në studion e “Quo Vadis” të moderatores Pranvera Borakaj në Vizion Plus.
I ftuar në studio, anëtari i Këshillit Kombëtar të PD, Lisandër Hoxha, tha se nuk është problem emri i kryetarit të PD, as Berisha, por fokusi duhet të jetë tek programi dhe premtimet për të ardhur në pushtet.
Ai tha se Berisha nuk është pengesë për demokratët. Megjithatë siaps Hoxhës, kushdo që do të akndidojë përballë berishës do ta ketë të vështirë.
Pjesë nga biseda:
Borakaj: Duket sikur, çfarëdo që të ndodhë në selinë blu, asgjë nuk e rrezikon karrigen e Sali Berishës?
Hoxha: Po të mbahet debati se a e heqim Berishën nga PD, çdo diskutim rrethohet te kjo çështje. Demokratët me votë e bënë kryetar Sali Berishën. E kanë ndjekur pa interes, me dëshirën për të bashkuar PD. Berisha është një politikan i fortë dhe ka dhënë garanci për të ribashkuar PD-në në një mision për të transformuar Shqipërinë.
Borakaj: E ka realizuar këtë mision?
Hoxha: Pjesërisht po. Rithemelimi, për shkak të tekave të grupit parlamentar, nuk u bë i plotë. PD e ka të domosdoshme rithemelimin e saj. Ne nuk e kemi problemin kush është kryetar, por me modelin politik që duam t’u paraqesim shqiptarëve, çfarë do të jenë premtimet për shqiptarët, pasi vendi është në një krizë të madhe. Patjetër do të ketë një garë, por do të jetë shumë e vështirë për të sfiduar liderin historik.
Borakaj: Ai do të garojë.
Hoxha: Unë them “nëse”, sepse nuk janë regjistruar kandidatët. Në këtë aspekt them se, nëse garon, do të jetë shumë e vështirë për këdo. Nesër, nëse thotë se s’do merret me politikë, çdo demokrat do të konsultohet me Berishën. Ne nuk e kemi problem Berishën në PD.
Borakaj: A është Berisha shpresa e PD për të ardhur në pushtet?
Hoxha: Unë mendoj se thelbi është rithemelimi i PD. Ne jemi me struktura të njëjta me ato të vitit 1992. Unë mendoj se nuk duhet të jemi në këtë situatë, edhe për shkak të Kodit Zgjedhor. Ne na duhen parti politike moderne që t’i ngjajnë kohës. Sot ka nevojë për debate. Ky Kuvend Kombëtar ka mundësi të transformojë PD rrënjësisht. Së dyti, Berlusconi, i cili është lideri i së djathtës italiane, ndërtoi një projekt politik që solli të djathtën në pushtet. Ne nuk duhet të ngatërrojmë kryetarin e partisë me strategjinë.