Situata politike në vend ka qenë shkak i debatit mes anëtarit të Këshillit Kombëtar të PD, Lisandër Hoxha, dhe gazetarit Denis Minga këtë të enjte në studion e “Quo Vadis” të moderatores Pranvera Borakaj.
Gazetari Minga tha se kohët e fundit është Edi Rama ai që është afruar më shumë me SHBA-të, ndërkohë që Berisha e ka braktisur totalisht linjën konservatore të Trump.
Pjesë nga biseda:
Minga: Rama ka bërë dy lëvizje, Bordi i Paqes dhe anulimi i tenderit për Porto Romanon, që e kanë bërë Ramën më pranë Uashingtonit. Ju keni ndryshuar, Lisandër.
Lisandër Hoxha: Rama nuk e lehtëson dot veten penalisht.
Minga: Ka akuzë ndaj Ramës, ore? Këto janë thashetheme.
Lisandër Hoxha: Janë publikuar edhe në media.
Minga: Ka akuzë për Edi Ramën?
Lisandër Hoxha: Do të ketë.
Minga: Po për Berishën ka akuzë?
Lisandër Hoxha: Ka një akuzë.
Minga: Kjo lëvizje e Ramës ka bërë që edhe Berisha të ndryshojë krah. Duke parë që dështuan të gjitha tentativat për të hequr “non grata”, u tërhoq. Dhe para ca ditësh, duke sulmuar Gonzaton, tha se ai i poshtri kishte thënë që ne donim të bënim MAGA-n në Shqipëri. Berisha tha tani se nuk kemi asnjë synim të përhapim MAGA-n.
Lisandër Hoxha: Jo, tha se Berisha po përdor La Civita-n. Sipas Berishës, ambasadori ka thënë se Berisha po përdor një agjendë për ta nxjerrë Shqipërinë nga BE.
Minga: Fushata e Berishës “ta bëjmë Shqipërinë e madhe” ishte MAGA.
Lisandër Hoxha: Ç’të keqe ka këtu?
Minga: Asgjë të keqe, por MAGA me BE nuk janë njësoj. Berisha ka thënë tani që ne jemi vetëm për BE. Pra, Berisha ka shkuar te partitë liberale të djathta, ka lënë konservatorizmin trumpist. Berisha ka vetëm një meritë: rrafshoi të gjitha forcat e reja. E dyta, Berisha po shfrytëzon problemin që ka Rama me Gjermaninë dhe po synon të afrohet.
Lisandër Hoxha: Rama i ka ditët e numëruara, i ka ditët më të zeza.
Minga: Fillove letërsi tani.
Lisandër Hoxha: Nuk bën më njeri burg për Ramën.