Në Gjykatën e Posaçme u zhvillua seanca për ish-presidentin e vendit, Ilir Meta, Monika Kryemadhin dhe të pandehurit e tjerë, nëse dosja e tyre do të kalojë apo jo për gjykim.
Të dy janë vënë nën akuzë për tre çështje korrupsioni; dosjen e njohur si CEZ-DIA. Sotir Kllapi, prokurori i çështjes, pretendon se Ilir Meta, kur ka shërbyer si ministër i Energjitikës, në vend që të monitoronte mbledhjen e borxhit të prapambetur të faturave të energjisë në dëm të kompanisë CEZ, në fakt përdori pushtetin që shlyerja të bëhej përmes shoqërisë DIA, e cila nuk i përmbushte kriteret e domosdoshme ligjore për të kryer një shërbim të tillë. Sipas SPAK, administratori i kësaj kompanie, Kastriot Ismaili, fitoi rreth 6.5 milionë euro.
Ilir Meta akuzohet gjithashtu për kontratat e konsulencës dhe lobimit në Shtetet e Bashkuara të Amerikës, pastrimin e produkteve në blerjen e një shtëpie në Tiranë, si dhe mosdeklarimin e shpenzimeve mjekësore për periudhën 2013–2019.
Ndërkaq çështja e tretë është ajo e disa operacioneve për të cilat SPAK dyshon se të pandehurit kanë fshehur origjinën e parave.
Të dy, Kryemadhi dhe Meta janë deklaruar të pafajshëm, ndërsa në seancën e kaluar ish-deputetja kërkoi kthim të çështjes për hetime të mëtejshme për shkak të mungesës së veprimeve hetimore. Krahas dyshimeve për vepra korruptive, ish bashkeshortet akuzohen edhe për pastrim parash.
Vendimi për të katërt të bashkëpandehurit, pas mbylljes së shqyrtimit gjyqësor, do të jepet në datën 12 mars, pasi gjyqi i kësaj të enjteje dështoi për shkak se avokati i Piro Xhixhos nuk ishte i pranishëm.