Ramush Haradinaj është një nga figurat më të dallueshme të politikës shqiptare në Kosovë, jo për shkak të retorikës apo pranisë mediatike, por për shkak të vendimeve dhe veprimeve konkrete në momentet më të ndjeshme për shtetin, njofton agjencia e lajmeve INA. Rruga e tij politike është e lidhur ngushtë me proceset kyçe të Kosovës: luftën për liri, ndërtimin e institucioneve, përballjen me drejtësinë ndërkombëtare dhe raportet me faktorët ndërkombëtarë.
Këto dhjetë arsye nuk synojnë idealizim, por paraqesin fakte dhe momente që dëshmojnë peshën reale politike të Ramush Haradinajt në historinë e pasluftës së Kosovës.
1. Ramush Haradinaj ka dëshmuar në çdo periudhë historike se është lider i vendosur, i gatshëm të sakrifikojë edhe familjen në betejat për lirinë dhe shtetndërtimin e Kosovës.
2. Në vitet 2004–2005 u zgjodh për herë të parë kryeministër i Kosovës, por e braktisi karrigen e pushtetit për t’u përballur me drejtësinë ndërkombëtare, duke dëshmuar pastërtinë e luftës së UÇK-së. Edhe pas thirrjeve të përsëritura nga Gjykata e Hagës, ai doli i pafajshëm.
3. Flet disa gjuhë të huaja – anglisht, gjermanisht dhe frëngjisht – dhe gjatë përvojës së tij politike e ushtarake ka ndërtuar raporte të mira me diplomatë të rëndësishëm në arenën ndërkombëtare.
4. Gjatë mandatit të tij si kryeministër dha kontributin kryesor në krijimin e Ushtrisë së Kosovës, një nga aktet më të rëndësishme për sovranitetin dhe sigurinë e vendit.
5. Miratoi Ligjin për Trepçën, iu kundërpërgjigj Serbisë me taksën 100 për qind, rriti pagat dhe u zotua për forcimin ekonomik të Kosovës.
6. Forcoi pozicionin e Kosovës në dialogun me Serbinë, duke insistuar në një zgjidhje finale që do të përfshinte njohjen reciproke.
7. Ndaloi ndarjen e Kosovës, duke u pozicionuar qartë kundër çdo ideje që cenon integritetin territorial të vendit.
8. Në një kohë kur Serbia kërcënon hapur me luftë, si President ai do të ishte komandant suprem i Forcave të Armatosura – një rol që, për shkak të përvojës së tij ushtarake, do ta ushtronte me përgjegjësi dhe vendosmëri.
9. Nuk është analist, por politikan që merr vendime, edhe në momentet më të vështira, pa hezitim dhe pa kalkulime të vogla.
10. I njeh mirë zhvillimet në trevat shqiptare, veçanërisht në Maqedoninë e Veriut, ku kontribuoi në luftën për liri në vitin 2001, si dhe në Luginën e Preshevës.