Presidenti i Shteteve të Bashkuara, Donald Trump, ka ndezur sërish tensionet në tregtinë ndërkombëtare me strategjinë e tij për të synuar njëkohësisht Kinën dhe Kanadanë.
Zyra e Përfaqësuesit të Tregtisë së SHBA-së (USTR) ka nisur një hetim të ri që mund të çojë në vendosjen e tarifave shtesë ndaj importeve kineze, një vendim që u bë publik pak para nisjes së Trump drejt Azisë për takime diplomatike, përfshirë një samit me presidentin kinez, Xi Jinping.
Administrata amerikane po heton nëse Kina i ka përmbushur angazhimet e saj bazuar në marrëveshjen tregtare të nënshkruar gjatë mandatit të parë të Trump, një zhvillim që mund të përshkallëzojë më tej tensionet midis dy ekonomive më të mëdha në botë.
Hetimi i ri i jep mundësinë administratës Trump të vendosë tarifa të reja, edhe nëse Gjykata e Lartë rrëzon masat e vendosura gjatë këtij viti.
Në një deklaratë zyrtare, USTR njoftoi se do të shqyrtojë “nëse Kina i ka zbatuar plotësisht angazhimet e saj dhe cilat masa, nëse ka, duhet të ndërmerren më tej.”
Nga ana tjetër, ambasada kineze në Uashington ka reaguar ashpër, duke kundërshtuar “akuzat e rreme” të SHBA-së.
Ndërkohë, burime nga administrata amerikane thonë për mediat e huaja se Trump planifikon të diskutojë marrëdhëniet tregtare SHBA–Kinë gjatë takimit me Xi Jinping, por gjithashtu është i përgatitur të trajtojë edhe çështje të tjera të hapura mes dy vendeve.