Kreu i Grupit Parlamentar të PS-së, Taulant Balla, pas takimit me kreun e Kuvendit Niko Peleshi dhe kryetarët e grupeve parlamentare të opozitës, Gazment Bardhi, Tedi Blushi dhe Fatmir Mediu deklaroi se mazhoranca ka marrë iniciativën për ngritjen e institucioneve të reja parlamentare dhe gjithashtu ka ftuar opozitën të marrë pjesë në këtë proces.
Ai shtoi se brenda kësaj jave pritet të shqyrtohet dekreti për qeverinë dhe programin, si edhe të mblidhet Konferenca e Kryetarëve për të përcaktuar kohën e debateve.
Në lidhje me akuzat e opozitës se është lënë jashtë procesit të Integrimit, Balla sqaroi se ngritja e Komisionit për Çështjet Europiane është një hap i rëndësishëm, duke e cilësuar atë si komisionin më të rëndësishëm parlamentar.
Taulant Balla: Kemi marrë iniciativën për ta propozuar, po ashtu kemi ftuar edhe opozitën siç është fryma e rregullores. Kryetari i Kuvendit i kërkoi grupeve parlamentare të propozojnë anëtarët e këshillit për rregulloren, Këshillit për Legjislacionin, të marrin jetë institucionet ku mund të takohesh me opozitën. Nuk mendoj se mund të konsultoheshim me opozitën para se kuvendi të takohej. Në seancën e tretë duhet të ngremë institucionet dhe për pasojë të marrim edhe vendimet.
Kuvendi i Shqipërisë duhet të ketë një organizim të ri, të reflektojnë edhe momentin historik që kemi, nevojën për t’iu përqasur marrëveshjes për anëtarësimin në BE, që më në fund kemi një komision parlamentar për diasporën. Na duhet që brenda kësaj jave të shqyrtohen dekretet për qeverinë dhe programin, na duhet të kemi gati konferencën e kryetarëve për të diktuar kohën e debatit. Është domosdoshmëri të kalojmë këtë etapë të parashikuar nesër, që brenda kësaj jave të mbyllim proceset e tjera.
Akuzave të opozitës se u përjashtuan nga Integrimi, iu jep këtë koment.
Taulant Balla: Propozimi i Ramës, është një ngritje të nivelit më të lartë të mundshëm të komisionit për çështjet europiane. Kur ka nisur ky komision 20 vjet më parë, ishte një komision ku anëtarësia nuk përllogaritej, ishte komision i dorës së dytë. Bëhet komisioni më i rëndësishëm./vizionplus.tv