Ramush Rushiti, i njohur si Kumanovari, në vitet 1988/89 u shpërngul në Kosovë, më saktësisht në Prizren. Që nga ajo kohë, jeton dhe vepron në këtë qytet të lashtë.
Në vitet ’90, Ramushi ishte një nga aktivistët më të përkushtuar në politikën kosovare në qytetin e Prizrenit. Për vite me radhë, ai udhëhoqi Komisionin për Kulturë, Rini dhe Sport në Lidhjen Demokratike të Kosovës – dega në Prizren.
Pas luftës, në vitin 2006, Ramushi themeloi klubin e basketbollit “Junior-06”, dhe pikërisht aty nisi një revolucion në basketbollin kosovar. Me këtë klub, ai ka fituar mbi 20 tituj kampionësh në grupmoshat e ndryshme, për meshkuj dhe femra. Sidomos nga viti 2021 e tutje, “Junior-06” është bërë i pamposhtur në grupmoshat e reja. Me dhjetëra lojtarë të dalë nga ky klub sot janë pjesë e përfaqësueses së Kosovës.
Kulmi i suksesit është padyshim rasti i Erxhan Osmanit, një histori frymëzimi. Erxhani, i lindur në Tropojë – më saktësisht në Bajram Curr të Shqipërisë – e kreu shkollën fillore në Prizren, në shkollën “Loyola”. Ishte viti 2011 kur për herë të parë u takua me trajnerin kumanovar Ramushin, përmes një lojtareje tjetër të klubit – Andrra Nurkollari – e cila atëherë ndiqte mësimet në të njëjtën shkollë.
Pas këtij takimi, trajneri Ramush kontaktoi me menaxhmentin e shkollës, konkretisht me drejtorin Dr. Eugen Qollaku, për të marrë leje që Erxhani t’i bashkohej stërvitjeve të klubit. Dhe ja ku është sot – Erxhan Osmani, një emër i njohur që po shkëlqen në basketbollin turk dhe më gjerë.