Të paktën 14 persona janë vrarë dhe 48 të tjerë kanë mbetur të plagosur nga një sulm i madh rus me dronë dhe raketa në kryeqytetin e Ukrainës gjatë natës dhe mëngjesin e kësaj të enjte.
Ky është sulmi më i madh që Rusia ka kryer ndaj vendit fqinj që nga nisja e përpjekjeve amerikane për t’i dhënë fund luftës. Dy fëmijë të mitur janë në mesin e viktimave, ndërsa bilanci pritet të rëndohet.
Përveç dëmeve në njerëz, edhe dëmet materiale janë kolosale. Të paktën 20 zona në shtatë rajone të Kievit u goditën dhe pothuajse 100 ndërtesa u dëmtuan, përfshirë një qendër tregtare në qendër të kryeqytetit.
Zyra e delegacionit europian u shkatërrua gjithashtu si pasojë e sulmit rus. Presidenti i Këshillit Europian, Antonio Kosta, dënoi sulmin dhe tha se Europa nuk do të intimidohet nga agresioni rus, por vetëm sa do të shtojë mbështetjen ndaj Ukrainës.
Sipas autoriteteve ukrainase, në sulm u përdorën raketa lundruese dhe balistike.
Presidenti Zelensky reagoi në orët e mëngjesit dhe tha se Rusia po zgjedh balistikën në vend të paqes. Sulmi i fundit, shkroi Zelensky, tregon qartë përgjigjen e Rusisë për përpjekjet diplomatike.
Ai bëri thirrje për reagim ndërkombëtar dhe sanksione të mëtejshme ndaj Moskës.
Nga ana tjetër, Rusia ka reaguar duke thënë se ende e do paqen, por sulmet do të vazhdojnë. Në një njoftim, Ministria Ruse e Mbrojtjes tha se sulmbombardimet kishin shënjestruar disa objekte dhe baza ushtarake. Moska ka mohuar rregullisht se ka synuar civilët, por dhjetëra kanë vdekur në muajt e fundit gjatë sulmeve në zona me popullsi të dendur.
/vizionplus.tv