Kandidatja e Lëvizjes Vetëvendosje, Albulena Haxhiu, ka dështuar t’i marrë votat e nevojshme për t’u zgjedhur si kryetare e Kuvendit të Kosovës
Nga 116 deputetë të pranishëm në sallë, vetëm 57 deputetë kanë votuar për. 56 deputetë votuan kundër Haxhiut, ndërkaq tre deputetë kanë abstenuar.
Pas dështimit të votimit të Albulena Haxhiut, Lëvizja Vetëvendosje e ka propozuar emrin e Donika Gërvallës për kryeparlamentare.
Ka qenë hera e parë që në legjislaturën e re, si propozim për kryeparlamentar ka qenë një emër tjetër, pos ai i Albulena Haxhiut.
Edhe Gërvalla dështoi të marrë shumicën si kandidate për kryetare të Kuvendit.
Ajo mori 57 vota për 56 kundër, tri abstenime.
Më 18 gusht, ka nisur, për të dytën herë me radhë, rrjedhja e afatit 30 ditor për konstituimin e Kuvendit të Kosovës, i vendosur nga Gjykata Kushtetuese.
Gjykata Kushtetuese publikoi aktgjykimin e plotë, përmes së cilit ka urdhëruar Kuvendin që brenda 30-ditësh të zgjedhë kryeparlamentarin e ri përmes votimit të hapur, duke e hedhur në votim të njëjtin kandidat jo më shumë se tri herë. Në aktgjykim nuk përmenden pasoja konkrete nëse Kuvendi dështon ta respektojë vendimin.
Aktgjykimi i Kushtetueses është mirëpritur nga partitë që mandatin e kaluar ishin në opozitë, por është kritikuar nga fituesja e zgjedhjeve, Lëvizja Vetëvendosje.