Luka Modric është konfirmuar tashmë se do të largohet nga Real Madrid gjatë kësaj vere dhe klubi ka filluar përgatitjet për zëvendësimin e tij. Me largimin e kroatit, pritet që të sjellin një mesfushor të ri dhe disa emra kanë filluar të shqyrtohen si pasues të mundshëm.
Në muajt e fundit është raportuar se mesfushori i Chelseat, Enzo Fernandez, është në radarët e Real Madridit, dhe sipas Cadena SER, ai shihet si një kandidat serioz për të zëvendësuar Modricin. “Los Blancos” kishin shfaqur interes për të që para transferimit të tij të shtrenjtë te Chelsea pas Kupës së Botës 2022, dhe tani, disa vite më vonë, mund të përpiqen sërish për ta marrë.
Megjithatë, duke marrë parasysh që Chelsea nuk do ta lëshojë lehtë Enzon, ky operacion do të jetë i vështirë për Real Madridin. Për këtë arsye, klubi po shqyrton edhe alternativa të tjera – dhe një prej tyre është një tjetër futbollist i përfaqësueses së Argjentinës, Exequiel Palacios.
Palacios është një lojtar që trajneri i ardhshëm i Real Madridit, Xabi Alonso, e njeh shumë mirë, pasi kanë punuar së bashku te Bayer Leverkusen gjatë viteve të fundit. Por edhe ky transferim nuk do të jetë i lehtë, pasi Manchester City raportohet se është i interesuar për ta sjellë Palacios në Premier League.