Ministri grek i Mbrojtjes paralajmëron se konfliktet në Ukrainë dhe Lindjen e Mesme nuk duhet ta shpërqendrojnë Evropën nga rreziqet në Ballkanin Perëndimor
Ministri i Mbrojtjes i Greqisë, Nikos Dendias, ka paralajmëruar se rajoni mund të shndërrohet në një vatër të re krize, ndërsa ka kritikuar mungesën e vëmendjes nga kryeqytetet evropiane ndaj zhvillimeve politike dhe sfidave të sigurisë në Ballkan. Gjatë një konference të mbajtur të martën në Athinë, ai ka theksuar se stabiliteti i rajonit nuk është i garantuar, veçanërisht në një periudhë kur përplasjet gjeopolitike janë duke krijuar pasiguri të reja në arkitekturën e sigurisë së Evropës.
Duke folur në hapjen e konferencës “Roli i Ballkanit Perëndimor në Arkitekturën e Re të Sigurisë”, ministri grek ka rikthyer vëmendjen te rreziku që, sipas tij, përbën mungesa e vëmendjes së Bashkimit Evropian nga zhvillimet në Ballkan.
“Stabiliteti nuk është i garantuar. Ai kërkon vigjilencë, vëmendje, por mbi të gjitha angazhim”, ka deklaruar Dendias, duke rikujtuar rëndësinë historike dhe strategjike të Ballkanit, si dhe potencialin që tensionet brenda rajonit të marrin përmasa më të gjera. Ai ka shprehur drojë se, pavarësisht rreziqeve ekzistuese, rajoni shpesh mbetet jashtë prioriteteve të diskutimeve politike dhe të sigurisë në institucionet e BE-së. Sipas tij, gjatë kontakteve me përfaqësues politikë në Bruksel dhe në kryeqytete të tjera evropiane, ka vërejtur se çështjet që lidhen me rajonin nuk marrin vëmendje.
Dendias ka argumentuar se lufta në Ukrainë, konfliktet në Lindjen e Mesme dhe krizat e tjera, megjithëse kërkojnë angazhim të vazhdueshëm, nuk duhet ta largojnë vëmendjen e Evropës nga problemet e sigurisë në fqinjësinë e saj të drejtpërdrejtë.
“Nuk duhet të lejojmë që vatrat reale të luftës të na e shpërqendrojnë vëmendjen nga një problem potencialisht shumë i madh që ndodhet në fqinjësinë tonë”. Në këtë kontekst, ministri grek ka theksuar se siguria e Ballkanit Perëndimor është e pandashme nga siguria e përgjithshme e kontinentit evropian dhe se parandalimi i krizave të ardhshme kërkon angazhim të qëndrueshëm politik dhe strategjik.