Deputetja e VLEN-it, Kaltrina Beqiri, ka kritikuar opozitën shqiptare për bllokimin e shqyrtimit të Marrëveshjes ndërmjet Maqedonisë së Veriut dhe Shqipërisë për vendkalimet e përbashkëta kufitare, gjatë seancës së 129-të të Kuvendit.
Në një reagim në rrjetet sociale, Beqiri ka theksuar se opozita shqiptare, sipas saj, po pengon çështje që lidhen me të drejtat e shqiptarëve dhe interesat e qytetarëve.
Ajo ka rikujtuar edhe kundërshtimin e opozitës ndaj Ligjit për provimin e jurisprudencës në gjuhën shqipe, duke e krahasuar këtë qëndrim me dakordimin që, sipas saj, u arrit kur ishte fjala për Alta Bankën.
“Dje ishin kundër Ligjit për provimin e jurisprudencës në gjuhën shqipe, ndërsa sot, në seancën e 129-të, me procedurale po pengojnë shqyrtimin e Marrëveshjes me Shqipërinë për vendkalimet e përbashkëta kufitare, një projekt që lehtëson jetën dhe lëvizjen e qytetarëve”, ka shkruar Beqiri.
Deputetja e VLEN-it ka vlerësuar se opozita po vendos interesat politike mbi çështjet që prekin qytetarët.
“Shqiptarët nuk kanë nevojë për opozitë që bllokon zgjidhjet, por për përfaqësues që i mbrojnë interesat e tyre me vepra, jo me kalkulime politike!”, ka përfunduar ajo.