Kryetari i Prishtinës, Përparim Rama, ka deklaruar gjatë një interviste të shkurtër në SHBA se synimi i tij i radhës është të bëhet kryeministër i Kosovës.
Rama është ndaluar për intervistë nga krijuesi i përmbajtjes Khan, i cili e ka pyetur për profesionin dhe pjesën e preferuar të punës së tij.
Duke u prezantuar si kryetar i Prishtinës, kryeqytetit të Kosovës, Rama ka thënë se synimi i tij i radhës është të marrë drejtimin e Qeverisë.
“Pjesa e preferuar e punës time është misioni im i radhës, të bëhem kryeministër, në mënyrë që të pastrojmë dhe rregullojmë shtetin”, ka deklaruar Rama.
I pyetur nga Khan për kryeministrin aktual, Albin Kurti, Rama ka thënë se ai nuk po bën punë të mirë dhe se duhet “t’ia tregojë rrugën”.