Bashkëkryetari i VLEN-it, Izet Mexhiti, ka deklaruar se nuk është bërë pishman për largimin e tij nga BDI-ja, duke theksuar se kjo është një çështje e mbyllur për të.
Duke folur në emisionin “N’Dritë” në Alsat-M, Mexhiti tha se dalja nga BDI-ja nuk ka qenë një vendim i momentit, por rezultat i një përplasjeje të gjatë të brendshme.
“Assesi, e para nuk kam dal ad-hok, për shkak të një çështjeje, por ka qenë një luftë e brendshme 7-8 vite. Nuk ka qenë e lehtë, por në momentin që kam dalë jashtë, është kapitull i mbyllur dhe kam vazhduar me opozitën shqiptare e cila tani qeverisë me shqiptarët, ndërsa BDI është në opozitë”, deklaroi Mexhiti.
Ai theksoi se tashmë është i fokusuar në angazhimin e tij brenda VLEN-it.
“Këtë kapitull e kam mbyllur. Jam pjesë e VLEN-it dhe bashkëkryetar i VLEN-it”, tha Mexhiti.
Megjithatë, Mexhiti nuk e përjashtoi mundësinë e bashkëpunimit të VLEN-it me subjektet tjera politike shqiptare, përfshirë edhe opozitën për çështje të caktuara.
“Sepse fundja jemi subjekte shqiptare dhe ka momente ku duhet të jemi bashkë, por në parim jemi konkurrentë politikë”, u shpreh Mexhiti.
*Mexhiti: VLEN është e përcaktuar në programin e saj, përçarjet janë te opozita*
Bashkëkryetari i VLEN-it, Izet Mexhiti, ka komentuar spekulimet për një rikthim të mundshëm në BDI, të cilat ditëve të fundit u përfolën në opinion.
Në emisionin “N’Dritë” në Alsat-M, ai ka theksuar se VLEN mbetet i fokusuar në realizimin e programit të përbashkët.
“Pashë se zërat ishin të ndryshëm, situata u sqarua, por nuk ka asgjë. VLEN është i përcaktuar në realizimin e programit, është projekt i përbashkët dhe i ka kontribuar skenës politike që të ketë dy taborë të fuqishëm”, deklaroi Mexhiti.
Ai tha se nuk është politikan që bën lëvizje të shpejta dhe kujtoi largimin e tij të mëparshëm nga subjekti politik ku ka qenë nënkryetar.
“Nuk jam kalkulues dhe të bëj lëvizje të shpejta. Njëherë e kam bërë atë lëvizje dhe ka qenë e paralajmëruar brenda subjektit ku kam qenë nënkryetar. Kemi bërë betejë të brendshme për zërin ndryshe dhe kur u shterën mundësitë mora rrugëtimin e ri”, tha ai.
Mexhiti theksoi se VLEN mbetet i hapur edhe për zgjerim, ndërsa hodhi poshtë pretendimet për përçarje brenda subjektit.
“VLEN është i hapur edhe për t’u zgjeruar dhe nëse flasim për përçarje, në VLEN nuk ka përçarje. Po konsolidohet çdo ditë e më tepër. Përçarje ka te opozita shqiptare, siç është AKI-ja dhe Fronti Evropian. Është çështje e opozitës”, u shpreh Mexhiti.
Duke folur për situatën politike në Bërvenicë, ai tha se qëndrimi i VLEN-it është i qartë dhe se janë të fokusuar në garën politike atje.
“Statusi ka qenë i qartë, jemi të fokusuar në Bërvenicë, ku VLEN ka kandidatin e vet, ndërsa opozita shqiptare i humbi zgjedhjet para gjashtë muajsh dhe jemi në garë politike atje”, deklaroi Mexhiti.