Ministrja e Drejtësisë, Donika Gërvalla, ka folur për herë të parë pas aktgjykimit dënues të shkallës së parë në Gjykatën e Hagës ndaj ish-krerëve të UÇK-së.
Ajo tha se janë duke punuar lidhur me ketë çështje.
“Sa i përket heshtjes, nuk kam heshtur, jam ministre e Drejtësisë. Kryeministri ka dhënë një deklaratë në emër të qeverisë. Unë me ekipin tim qysh në ditën e parë i jam futur punës me qëllim që të përgatitemi për një betejë sepse çështja e Speciales është betejë ligjore, jo e deklaratave në media. Duhet të jemi profesionistë të mençur, pa shumë bërtima. Duhet të përgatitemi për instancën e ardhshme.
“Ju e keni dëgjuar edhe njërin prej avokatëve të njërit prej të akuzuarave dhe të dënuarve në shkallë të parë, i cili thotë se Qeveria nuk di se çfarë do të mund të bënte më shumë. Unë jam e bindur që mund të bëjmë më shumë, por jemi duke i analizuar të gjitha rrethanat”, deklaroi Gërvalla.
Gërvalla ka folur për kërkesat e protestuesve për dorëheqjen e saj.
Duke mohuar se ka dorëzuar dosje në Gjykatën Speciale kundër ish-krerëve të UÇK’së, ajo tha se kjo temë është bërë “bozë”.
“Deklaratat që më lidhin mua me bashkëpunimin, tashmë është bërë bozë sepse i kam shpjeguar disa herë. Nuk kanë asnjë hallkë, as me UNMIK as me EULEX, as me Gjykatën Speciale, nuk ka asnjë pikëtakim timin, as direkt dhe as indirekt. Edhe pak durim duhet të kemi sepse aktgjykimi do të vijë shpejt. Ata që më së shumti kanë bërtitur në këtë lëmi e më kanë etiketuar, të paktën para pasqyrës të skuqen në një moment, por që kanë përsëritur gënjeshtrat”.