Autoritetet e Kosovës kanë shprehur mirënjohje ndaj institucioneve të Maqedonisë së Veriut për reagimin emergjent dhe angazhimin e një helikopteri në shuarjen e zjarreve në fshatin Krivenik të Hanit të Elezit, përgjatë brezit kufitar.
Sipas Ambasadës së Republikës së Kosovës, ndërhyrja me kapacitet ajror u realizua pas kërkesës së autoriteteve lokale dhe qendrore të Kosovës, ndërsa mbështetja nga Maqedonia u vu në dispozicion në kohë rekord, duke pasur ndikim të menjëhershëm në përballimin e situatës.
Në veçanti, Ambasada ka shprehur konsideratë për Ministrinë e Punëve të Brendshme të Maqedonisë së Veriut dhe për Drejtorin e Qendrës për Menaxhim me Kriza, Muhamed Ali, për reagimin dhe koordinimin e shpejtë.
“Falënderojmë autoritetet relevante të Maqedonisë së Veriut për reagimin emergjent me helikopter në shuarjen e zjarreve në fshatin Krivenik të Hanit të Elezit, përgjatë brezit kufitar”, thuhet në reagimin e Ambasadës së Republikës së Kosovës.