Një skandal politik dhe i sigurisë ka shpërthyer në Slloveni, pasi presidentja Nataša Pirc Musar është vënë në qendër të dyshimeve për lidhje të mundshme me rrjete të inteligjencës ruse. Akuzat kanë nisur pas një aksidenti automobilistik, ku në automjetin e presidentes ndodhej edhe një mikeshë e saj me origjinë ruse.
Mediat sllovene dhe agjencia austriake APA kanë raportuar për lidhjet e Viktorija Krivolucka, mikeshës së vjetër të presidentes, me Roman Jeglič, ish-zyrtar i inteligjencës sllovene, i cili u largua drejt Rusisë në vitet ’90. Krivolucka ka pranuar se ka jetuar me Jeglič në Rusi për disa vite, por deklaron se nuk ka pasur kontakte me të prej rreth 15 vitesh.
Zhvillimi ka shkaktuar reagim të fortë politik. Deputeti i opozitës Žan Mahnič ka kërkuar që presidentes dhe kabinetit të saj t’u ndërpritet përkohësisht aksesi në raportet e inteligjencës dhe informacionet e klasifikuara, duke argumentuar se rrethanat kërkojnë një vlerësim të plotë të sigurisë kundërspiunazhore.
Në qendër të debatit janë vendosur edhe udhëtimet private të Pirc Musar në Rusi dhe marrëdhëniet e saj me Krivolucka. Sipas raportimeve, presidentja dhe mikeshja e saj kanë vizituar disa herë Moskën dhe Shën Petersburgun para se Pirc Musar të bëhej presidente.
Por Zyra e Presidentes i ka mohuar kategorikisht akuzat, duke deklaruar se Pirc Musar nuk bashkëpunon me rrjetet ruse të spiunazhit. Presidenca ka theksuar gjithashtu se shërbimi inteligjent slloven, SOVA, nuk e ka njoftuar për ndonjë rrezik të mundshëm sigurie lidhur me Krivoluckan.
Pirc Musar, e zgjedhur presidente në vitin 2022 dhe e konsideruar politikisht pro-evropiane, ka kritikuar publikisht pushtimin rus të Ukrainës. Deri tani, nuk është bërë publike ndonjë provë që të vërtetojë bashkëpunim të saj me inteligjencën ruse; bëhet fjalë për dyshime dhe akuza politike që po hetohen dhe po debatohen në Slloveni.
Ndërkohë, debati pritet të intensifikohet, ndërsa institucionet sllovene po përballen me pyetjet nëse marrëdhëniet e personave të afërt me presidenten kanë krijuar apo jo një rrezik të mundshëm kundërspiunazhi dhe ekspozimi ndaj informacioneve të klasifikuara.