Migrimi drejt Zvicrës ka vazhduar të shënojë rënie edhe gjatë gjysmës së parë të vitit 2026. Sipas të dhënave të publikuara nga autoritetet zvicerane, migrimi neto në popullsinë e huaj me qëndrim të përhershëm ishte 29,884 persona, ose 12.5% më pak krahasuar me të njëjtën periudhë të vitit 2025, transmeton albinfo.ch.
Nga janari deri në fund të qershorit, në Zvicër u vendosën 74,112 persona në kuadër të popullsisë së huaj me qëndrim të përhershëm. Kjo paraqet një rënie prej 2,220 personash ose 2.9% krahasuar me gjashtëmujorin e parë të vitit të kaluar.
Nga vendet e BE-së dhe EFTA-s, në Zvicër u zhvendosën 55,761 persona, 0.7% më pak se një vit më parë. Ndërsa nga vendet jashtë BE/EFTA-s erdhën 18,351 persona, një rënie prej 9%.
Në të njëjtën kohë, numri i personave që u larguan nga Zvicra vazhdoi të rritet. Në gjashtë muajt e parë të vitit, vendin e lanë 39,251 persona nga popullsia e huaj me qëndrim të përhershëm, 1,608 më shumë se në të njëjtën periudhë të vitit 2025.
Në fund të qershorit 2026, në Zvicër jetonin gjithsej 2,432,444 shtetas të huaj me qëndrim të përhershëm.
Punësimi mbetet arsyeja kryesore
Tregu i punës vazhdon të jetë një nga faktorët kryesorë që tërheq emigrantët drejt Zvicrës. Nga vendet e BE/EFTA-s, 41,321 persona erdhën gjatë gjysmës së parë të vitit për të filluar një punë afatgjatë. Kjo është 679 persona ose 1.6% më pak se në të njëjtën periudhë të vitit 2025.
Ndërkohë, edhe numri i lejeve të reja për punëtorët ndërkufitarë ka rënë. Nga janari deri në qershor janë lëshuar 33,219 leje të reja, krahasuar me 36,876 në gjashtëmujorin e parë të vitit të kaluar.
Të dhënat tregojnë kështu një tendencë të vazhdueshme të rënies së migrimit drejt Zvicrës, e cila është vërejtur që nga viti 2024, ndërsa paralelisht po rritet numri i personave që largohen nga vendi./Albinfo.ch