Parlamenti i Libanit ka votuar për heqjen e dënimit me vdekje, duke e bërë vendin të parin në botën arabe që e zëvendëson këtë dënim me burgim të përjetshëm dhe punë të rëndë.
Vendimi u miratua nga shumica e Parlamentit 128-anëtarësh, ndërsa blloku parlamentar i Hezbollahut votoi kundër heqjes së dënimit me vdekje, raporton Assocciated Press, transmeton Klankosova.tv.
Ministri i Drejtësisë i Libanit, Adel Nassar, e ka cilësuar vendimin si një “hap historik” për vendin.
Ndryshimi është mirëpritur edhe nga organizatat për të drejtat e njeriut, të cilat prej vitesh kanë kërkuar që moratoriumi mbi ekzekutimet të formalizohet dhe dënimi me vdekje të hiqet plotësisht.
Megjithatë, mbetet e paqartë se si do të zbatohet në praktikë dënimi i ri me burgim të përjetshëm dhe punë të rëndë, pasi disa deputetë kanë ngritur shqetësime për mënyrën e zbatimit të tij.
Vendimi i Parlamentit vjen në një kohë kur në Liban po diskutohet edhe një ligj i debatueshëm për amnisti të përgjithshme.