Gjatë muajit korrik Kina vijoi vrullin në eksportin e automjeteve, bëri të ditur të mërkurën Shoqata e Prodhuesve të Automjeteve e Kinës.
Sipas të dhënave të fundit, në korrik të këtij viti, numri i automjeteve të eksportuara arriti në 1.043 milionë, një rritje prej 0.6% në bazë mujore dhe një rritje prej 81.3% në bazë vjetore. Ndër to, numri i eksporteve të automjeteve me energji elektrike ishte 553 mijë, me një rritje prej 5.7% në bazë mujore dhe 145.5% në bazë vjetore.
foto nga VCG
Ky është muaji i dytë radhazi që eksportet e automjeteve kineze tejkalojnë shifrën një milion, pasi eksportet tejkaluan 900 mijë në prill dhe maj për dy muaj radhazi. Për më tepër, përqindja e eksporteve të automjeteve me energji të re tejkaloi 50% për dy muaj radhazi.
Një zyrtar i shoqatës shpjegoi se arsyeja e ruajtjes së rritjes së shpejtë në eksportin e automjeteve është se Kina zotëron zinxhirin më të plotë të industrisë automobilistike në botë. Nga përpunimi i mineralit të litiumit, prodhimi i baterive dhe i mekatronikës, deri tek montimi i plotë i automjeteve, Kina siguron jo vetëm kapacitet prodhimi të mjaftueshëm dhe kosto të kontrolluar, por është në gjendje t’i rezistojë edhe rreziqeve të zinxhirit të furnizimit. Për më tepër, Kina ka formuar një avantazh thelbësor konkurrues në inteligjencën e industrisë së automjeteve.