Janë bërë të ditura identitetet e tre mërgimtarëve nga lagjja Nuhaj e Komogllavës së Ferizajt, të cilët humbën jetën në aksidentin tragjik të trafikut që ndodhi në Gjermani, teksa po udhëtonin drejt vendit ku jetonin dhe punonin.
Lajmi i rëndë ka tronditur familjarët, miqtë dhe gjithë komunitetin e Komogllavës, ndërsa ngushëllime të shumta janë shprehur për familjet e viktimave.
Sipas njoftimit mortor të publikuar nga faqja zyrtare e fshatit, në aksident kanë humbur jetën:
Tahir Tahiri, 61 vjeç, vëllai i Remzi Aliut dhe Xhelal Tahirit;
Gentian Tahiri, 34 vjeç, djali i Tahir Tahirit dhe vëllai i Astrit Tahirit dhe Gentiana Tahirit;
Laurent Aliu, 16 vjeç, djali i Bardhyl Aliut dhe vëllai i Loris Aliut dhe Anesa Aliut.
Sipas raportimeve të mëhershme, tre viktimat ishin nisur nga Kosova drejt Gjermanisë, ndërsa aksidenti ndodhi në orët e hershme të mëngjesit. Bazuar në informacionet e deritanishme, bëhet fjalë për një vetaksident, ku në automjet ndodheshin vetëm tre personat që humbën jetën.
Autoritetet gjermane kanë konfirmuar se tre persona kanë humbur jetën si pasojë e aksidentit, ndërsa hetimet për zbardhjen e plotë të rrethanave që çuan në tragjedi janë ende në zhvillim.
Ndërkohë, familjarët kanë bërë të ditur se për datën dhe orën e ceremonisë së varrimit do të njoftojnë publikun sapo të përfundojnë procedurat dhe të merren vendimet përkatëse.
“U shprehim ngushëllime familjeve të të ndjerëve për këtë humbje të rëndë”, thuhet në njoftimin mortor, të transmetuar nga Klankosova.tv.
Vdekja tragjike e Tahir Tahirit, Gentian Tahirit dhe Laurent Aliut ka lënë pas pikëllim të madh te familjet Tahiri dhe Aliu, si dhe te të gjithë banorët e Komogllavës dhe mërgimtarët kosovarë në Gjermani.