3 qërshor, Kumanovë
LLAUSHA ZENUNI
Ditët e fundit po shoh një narrativë që po përhapet me qëllim ose nga padija (80% jam e bindur se është e para) se protestat për Nartën dhe Zvërnecin qenkan të nxitura nga Greqia, se aty marrin pjesë grekë dhe se e gjithë kjo bëhet për të destabilizuar Shqipërinë.
Për mua, kjo nuk është thelbi i çështjes dhe madje besoj se kjo po përdoret për të larguar vëmendjen nga problemi i vërtetë. Nëse një grek apo italian ngre zërin për mbrojtjen e një vlere natyrore, historike apo kulturore në Shqipëri, kjo nuk e bën automatikisht kauzën të huaj dhe armiqësore. Kjo vetëm e bën atë individ të vetëdijshëm për atë që po ndodh.
Një e vërtetë nuk bëhet e pavërtetë vetëm sepse e thotë një grek. As një padrejtësi nuk shndërrohet në drejtësi vetëm sepse denoncohet nga dikush me kombësi tjetër. Më shqetëson fakti që në vend se të diskutojmë nëse është e drejtë apo jo të tjetërsohen, betonizohen dhe shfrytëzohen zona me rëndësi të veçantë natyrore e kombëtare, po humbasim kohë duke pyetur kush qëndron “prapa” protestuesve.
Për mua por edhe politikisht kjo është një taktikë e njohur: kur nuk mund të rrëzosh argumentin, sulmo folësin e kur nuk mund të arsyetosh veprimin, shpik një armik të jashtëm. Për mua, çështja nuk është kujt i janë shitur apo kujt mund t’i shiten këto territore: çështja është se PO SHITEN!
Çështja është se po diskutojmë emrin e blerësit, kur duhet të diskutojmë vetë aktin e shitjes! Nëse nesër një grek del në mbrojtje të një pylli shqiptar, unë nuk do ta shoh si “grek” por do ta shoh si një njeri që po mbron një të vërtetë.
Dhe nëse një shqiptar hesht përballë së njëjtës çështje, nuk do ta shoh si patriot vetëm për shkak të kombësisë së përbashkët, përkundrazi do ta shoh si tradhëtar. Patriotizmi nuk matet me atë se kë e fajëson. Matet me atë që je i gatshëm të mbrosh dhe sot pyetja kryesore nuk është kush po proteston, por pse po proteston!
#Albaniaisnotforsale #HandsoffAlbania #Shqipërianukshitet 
Llausha Zenuni /Televizioni News