Familja tradicionale evropiane me më shumë fëmijë po ndryshon me shpejtësi. Të dhënat më të fundit të Eurostatit për vitin 2025 zbulojnë ndryshime të thella demografike në Bashkimin Evropian: numri i familjeve me fëmijë po bie, ndërsa po rritet ndjeshëm numri i njerëzve që jetojnë vetëm ose si çifte pa fëmijë. Sipas Eurostat, për më tepër, për ata që kanë fëmijë, realiteti gjithnjë e më shpesh nënkupton që vetëm një prind mban të gjithë barrën e rritjes së tyre.
Vetëm çdo e katërta familje ka fëmijë
Nga gjithsej 203,1 milionë familje në BE, vitin e kaluar vetëm 47,4 milionë ose 23,4% kishin fëmijë. Pjesën më të madhe e përbëjnë çiftet me fëmijë (14,7%), të ndjekura nga familjet e tjera komplekse me fëmijë (5,6%) dhe prindërit e vetëm (3,0%).
Nga ana tjetër, 76,6% e familjeve janë pa fëmijë. Në këtë kategori dominojnë personat që jetojnë vetëm, të cilët përbëjnë 37,5% të të gjitha familjeve në BE. Pas tyre renditen çiftet pa fëmijë me 24,1%.
Tendenca gjatë dekadës së fundit (2016–2025) tregon qartë drejtimin në të cilin po lëviz Evropa:
Numri i familjeve njëanëtarëshe është rritur me 19,2% (nga 63,9 në 76,1 milionë).
Numri i çifteve pa fëmijë është rritur me 3,3%.
Numri i çifteve me fëmijë ka rënë me 6,3%.
Dallime të mëdha: Nga Sllovakia “familjare” te Finlanda e “vetmuar”
Përqindja më e lartë e familjeve me fëmijë është regjistruar në Sllovaki (35,4%), Irlandë (30,8%) dhe Qipro (28,2%).
Në anën tjetër qëndron Finlanda, ku vetëm 18,2% e familjeve kanë fëmijë. Situatë të ngjashme kanë edhe Lituania (18,4%) dhe Gjermania (19,9%).
Sa i përket numrit të fëmijëve, gjysma e familjeve evropiane me fëmijë (50,2%) kanë vetëm një fëmijë, 37,6% kanë dy fëmijë, ndërsa vetëm 12,2% rrisin tre ose më shumë fëmijë.
Familjet me një fëmijë janë më të zakonshme në Portugali (61,8%) dhe Bullgari (60,4%). Në të kundërt, në 14 nga 27 vendet e BE-së dominojnë familjet me dy ose më shumë fëmijë, të udhëhequra nga Suedia (57,8%) dhe Holanda (57,6%).
Maqedonia ende mbi mesataren evropiane për familjet me fëmijë
Eurostati mbledh të dhëna edhe për vendet kandidate për anëtarësim në BE. Sipas të dhënave për Maqedoninë, nga gjithsej 595,6 mijë familje, 66,1% (393,4 mijë) janë pa fëmijë, ndërsa 33,9% kanë fëmijë.
Në krahasim me mesataren e BE-së, ku 23,4% e familjeve kanë fëmijë, Maqedonia ka një përqindje dukshëm më të lartë të familjeve me fëmijë. Me këtë rezultat, vendi pozicionohet pranë Sllovakisë (35,4%) dhe Irlandës (30,8%), që kryesojnë në BE.
Nga 202,2 mijë familje me fëmijë në vend:
43,2% kanë një fëmijë (87,3 mijë).
43,4% kanë dy fëmijë (87,8 mijë).
13,4% kanë tre ose më shumë fëmijë (27,1 mijë).
Ndryshe nga BE-ja, ku dominojnë familjet me një fëmijë, në Maqedoni mbizotërojnë familjet me dy fëmijë. Gjithashtu, përqindja e familjeve me tre ose më shumë fëmijë (13,4%) është më e lartë se mesatarja e BE-së (12,2%).
Çdo e teta familje me fëmijë mbështetet te një prind i vetëm
“Shprehja se duhet një fshat i tërë për të rritur një fëmijë tingëllon bukur, por për shumë njerëz realiteti është që vetëm një i rritur mban të gjithë përgjegjësinë”, vlerëson Eurostati.
Në BE, vitin e kaluar kishte rreth 6,1 milionë familje me një prind, që do të thotë se 12,9% e familjeve me fëmijë mbështeten vetëm te një i rritur.
Ky fenomen është më i theksuar në Estoni, ku 40,6% e familjeve me fëmijë janë me një prind. Pas saj vijnë Lituania (32,7%) dhe Letonia (28,5%).
Përqindjen më të ulët të familjeve me një prind e kanë Sllovakia (3,1%), Greqia (3,8%) dhe Sllovenia (4,0%).
Sipas të dhënave të vitit 2025, Maqedonia bën pjesë ndër vendet evropiane me përqindjen më të ulët të familjeve me një prind, vetëm 2,6%.
Statistikat tregojnë gjithashtu se barra e rritjes së fëmijëve bie kryesisht mbi gratë. Plot 81,6% (5 milionë) e këtyre familjeve drejtohen nga nëna të vetme, ndërsa baballarët e vetëm përbëjnë 18,4%.
Shumica e këtyre familjeve (60,1%) kanë vetëm një fëmijë.
Këto të dhëna u publikuan në kuadër të Ditës Botërore të Prindërve (1 Qershor), e cila shërben si kujtesë për rolin kyç të familjeve, prindërve dhe kujdestarëve në shoqëri.