Një sukses i rëndësishëm në fushën e arsimit është shënuar me avancimin e mësimdhënëses së mësimit klasor, Zejnepe Bajrami, në titullin më të lartë profesional – Mësimdhënëse Këshilltare. Zejnepe Bajrami, e cila vepron në SHFK “Toli Zordumis” në Kumanovë, pas 16 vitesh përvojë në arsim dhe pesë vitesh nga avancimi në titullin Mësimdhënëse Mentore, ka arritur të avancojë edhe në titullin Mësimdhënëse Këshilltare, duke përmbushur me sukses të gjitha kriteret dhe standardet e parapara për këtë nivel profesional.
Avancimi në titullin Mësimdhënëse Këshilltare është rezultat i punës së saj shumëvjeçare dhe kontributit të dëshmuar në të gjitha fushat e vlerësimit profesional.
Përveç angazhimit në mësimdhënie, ajo ka dhënë kontribut të rëndësishëm në mentorimin e mësimdhënësve fillestarë dhe praktikantëve, në punën e komisioneve profesionale, në recenzimin dhe hartimin e materialeve mësimore, në realizimin e projekteve edukative dhe inovative, si dhe në promovimin e praktikave bashkëkohore në arsim.
Sipas rezultateve të publikuara nga Ministria e Arsimit dhe Shkencës, Zejnepe Bajrami është vlerësuar me numrin maksimal të pikëve në nivel republikan, ndërsa në nivel komunal është renditur e para në listën e kandidatëve të avancuar.
Ky rezultat përfaqëson një vlerësim të lartë të kompetencave profesionale, përkushtimit dhe kontributit të saj shumëvjeçar në zhvillimin e arsimit. Ajo dëshmon se puna e vazhdueshme, inovacioni, përgjegjësia profesionale dhe investimi në zhvillimin profesional njihen dhe vlerësohen në nivelet më të larta.
Avancimi në titullin Mësimdhënëse Këshilltare përbën një nga arritjet më të rëndësishme profesionale në karrierën e saj dhe një shembull të suksesit që arrihet përmes përkushtimit, dijes dhe punës së palodhshme në shërbim të arsimit./Televizioni News
