Maqedonia e Veriut dhe Kroacia sot në Ohër nënshkruan Marrëveshje për bashkëpunim strategjik ndërmjet dy qeverive, me të cilën marrëdhëniet mes dy vendeve ngrihen në një nivel më të lartë.
Pas takimit me kryeministrin kroat Andrej Plenkoviq, kryeministri Hristijan Mickoski theksoi se vizita nuk është vetëm një takim diplomatik, por një konfirmim i miqësisë së ndërtuar ndër vite. Ai nënvizoi se Kroacia është partnere e afërt, vend mik dhe aleate në NATO, me të cilën Maqedonia ndan interesa të përbashkëta, sfida rajonale dhe vizion për një Ballkan Perëndimor stabil dhe evropian.
Mickoski tha se rruga e Maqedonisë drejt Bashkimit Evropian, për fat të keq, po përballet me bllokada joparimore, duke e falënderuar Kroacinë për qëndrimin e saj parimor në këtë çështje. Sipas tij, marrëveshja përbën një kornizë për partneritet afatgjatë dhe një përcaktim të qartë politik për thellimin e marrëdhënieve në fusha me rëndësi për të ardhmen e dy shteteve.
Kryeministri theksoi se bashkëpunimi do të zhvillohet përmes nismave dhe projekteve konkrete në transport, energjetikë, teknologji informative, industri, shëndetësi, arsim, siguri publike, mbrojtje civile, mbrojtje, siguri kibernetike dhe menaxhim kufijsh.
Kryeministri kroat Andrej Plenkoviq theksoi marrëdhëniet e mira ekonomike mes dy vendeve dhe vlerësoi trajtimin e mirë të kroatëve në Maqedoninë e Veriut.(INA)