Pas një pune intensive kërkimore që ka zgjatur plot një vit, së shpejti pritet të shfaqet premiera e filmit dokumentar “Një emër, shumë gjurmë”, i cili i kushtohet tërësisht jetës, rrugëtimit dhe veprës së çmuar të Nazmi Maliqit.
Dokumentari me regji të Arsim Leskovicës dhe producentit Driton Maliqi, sjell një pasqyrim të gjerë dhe mjaft emocional përmes hulumtimeve të detajuara nëpër arkiva të ndryshme, si dhe përmes 30 intervistave të realizuara me njerëz që ndanë rrugëtimin profesional dhe jetësor me të.
Rrëfime, kujtime dhe dëshmi të gjalla
Sipas njoftimit zyrtar nga faqja e tij, ky projekt filmik sjell rrëfime, kujtime dhe dëshmi të fuqishme përmes zërave të atyre që e njohën nga afër, bashkëpunuan dhe ecën pranë tij në periudha të ndryshme të jetës.
“Çdo intervistë mbart emocion, nostalgji dhe respekt, duke dëshmuar se disa njerëz nuk mbeten vetëm kujtim, por vazhdojnë të jetojnë përmes gjurmëve që lënë pas. Ky dokumentar është një dëshmi e gjallë e dashurisë, respektit dhe gjurmëve të pashlyeshme që ai la pas”, thuhet në njoftim.
Premiera së shpejti
Realizuesit e këtij projekti kanë bërë të ditur se detajet rreth datës, vendit dhe orës së premierës së madhe do të bëhen të dita shumë shpejt. Ky dokumentar pritet të zgjojë interes të madh tek opinioni i gjerë dhe komuniteti akademik e shoqëror, duke vlerësuar kontributin e lartë që Nazmi Maliqi ka lënë si trashëgimi.(INA)