Péter Magyar, kreu i partisë Tisza dhe kryeministri i ardhshëm i Hungarisë, i cili i dha fund sundimit 16-vjeçar të Viktor Orbán pas zgjedhjeve të prillit, akuzoi qeverinë në largim për shpenzime publike të pakontrolluara dhe për marrjen e detyrimeve të reja financiare në ditët e fundit të mandatit të saj, duke njoftuar një rishikim urgjent të buxhetit pas marrjes së pushtetit, raporton Anadolu.
Magjari akuzoi qeverinë në largim të kryeministrit Viktor Orban për “vjedhje të plotë të thesarit të shtetit” në javën e fundit të mandatit të saj dhe njoftoi se qeveria e re do të kryejë menjëherë një audit të detajuar të shpenzimeve buxhetore.
https://www.facebook.com/peter.magyar.102/posts/27316660597941696?ref=embed_post
Ai tha se, sipas dokumenteve që pretendon se i ka marrë, qeveria në largim jo vetëm që po shpenzon fonde të dakordësuara dhe të papaguara, por po merr përsipër edhe detyrime të reja në shkallë të gjerë.
“Qëllimi nuk është më vetëm të shpenzohen paratë e dakordësuara, por që ende nuk janë paguar, por të merren përsipër angazhime të reja në shumën më të madhe të mundshme. Kontrollet në lidhje me angazhimet dhe blerjet e pronave janë hequr plotësisht dhe paratë po shpenzohen lirisht”, tha Magyar.
Ai paralajmëroi për atë që ai e quajti tregues fiskalë që sugjerojnë se deficiti buxhetor i Hungarisë mund të arrijë në 6.8 përqind të produktit të brendshëm bruto (PBB), shumë më lart se objektivi i vendosur më parë prej 3.9 përqind, si dhe një parashikim i rishikuar më vonë prej pesë përqind.
“Ata gënjyen e gënjyen në mëngjes, mesditë e natë…” tha Magyar në një kritikë të ashpër ndaj qeverisë në largim.
Ai njoftoi se partia Tisa, sapo të formohet qeveria, do të kryejë një auditim të plotë të shpenzimeve publike, duke përfshirë shpenzimet, kontratat, institucionet dhe kompanitë shtetërore, veçanërisht në fushat e investimeve dhe prokurimit publik.
“Qeveria Tisza që do të formohet do të rivendosë menjëherë menaxhimin e përgjegjshëm financiar të buxhetit, do të ndalojë shpërdorimin e parave të taksapaguesve dhe do t’i japë fund vjedhjes dhe shpërdorimit”, tha Magyar.
Ai shtoi se qeveria e re do të përpiqet të sigurojë që paratë publike të mos shkojnë në duart e “disa njerëzve”, por përkundrazi t’u shërbejnë interesave të të gjithë qytetarëve hungarezë.
“U bëj thirrje krerëve të ministrive që të mos ndërmarrin asnjë angazhim të ri derisa të formohet qeveria Tisza dhe të bëjnë vetëm pagesat e nevojshme për funksionimin normal”, tha ai.