Kritikat e bëra në Komisionin e Reformës Territoriale se bashkitë po humbasin kompetencat e tyre kanë marrë përgjigje nga ministri për Pushtetin Vendor, Ervin Demo. Pas mbledhjes së qeverisë, ministri pranoi se ky komision shërben për t’u njohur me shqetësimet e bashkive, në mënyrë që të përmirësohen shërbimet ndaj qytetarëve.
“Komisioni është aty për të adresuar disa elementë që kanë të bëjnë me funksionet e bashkive. Kuptohet që qeveria qendrore nuk do të bjerë gjithnjë dakord me bashkitë. Ajo që duhet të garantojmë është që bashkitë duhet, me ato çfarë kanë, kompetenca të deleguara apo që burojnë nga ligji, të jenë më të forta dhe të ofrojnë shërbime më të mira në territor”, Ervin Demo, ministri për Pushtetin Vendor.
Sa i përket Paketës së Maleve, Demo bëri me dije se tashmë 4 bashki të tjera kanë përfunduar me ndarjen e zonave prioritare.
“Kemi katër bashki të tjera që kanë miratuar zonat e tyre prioritare. Kjo e çon në 40 numrin e institucioneve vendore që kanë përfunduar procesin. Paketa e Maleve ka një interes që sa vjen dhe shtohet”, tha Demo.
Pas tij, Ministri për Kulturën, Turizmin dhe Sportin, Blendi Gonxhja sqaroi se janë në kontakt me agjencitë dhe hotelet për të garantuar që nuk do të ketë problematika me ujin dhe mbetjet gjatë sezonit veror.
“Trajtimi i mbetjeve, Ministria e Mjedisit, por kemi ngritur një task-forcë e cila do të shërbejë për monitorimin dhe pastrimin e zonave në bregdet apo liqene. Për ujësjellësin, jemi në kontakt të vazhdueshëm me agjencitë dhe jemi në kontakt me hotelet në mënyrë që të njihemi me problematikat e tyre. Situata mjaft më mirë me vendosjen e pajisjeve për ujërat e ndotura”, Ministri për Kulturën, Turizmin dhe Sportin, Blendi Gonxhja.
Gjithashtu, me vendim të qeverisë do të rritet edhe mbështetja financiare për sportistët elitarë dhe trajnerët e tyre me 75%.
/vizionplus.tv