Bashkimi Demokratik për Integrim përmes një reagimi thotë se Korridori 8 mbetet projekt strategjik për vendin dhe rajonin dhe duhet të vazhdojë pavarësisht zhvillimeve të fundit dhe debatit rreth trasesë, përcjell TV21. Sipas BDI-së, shtyrja e vizitës së delegacionit të UNESCO nuk ndikon në realizimin e projektit, ndërsa theksohet se ai është i rëndësishëm për lidhjen ekonomike lindje–perëndim dhe për integrimin rajonal. BDI shton se projekti ka mbështetje ndërkombëtare dhe duhet të realizohet sipas standardeve dhe planifikimit ekzistues.
“Shtyrja e vizitës së delegacionit të UNESCO-s nuk e vë në pikëpyetje realizimin e projektit, por konfirmon seriozitetin dhe domosdoshmërinë e realizimit të tij sipas projektimit të realizuar në kohën kur BDI ishte pjesë e Qeverisë. Siç e pamë dje, vet Ministri i Transportit ka filluar të reterojë nga qëndrimet e shprehura publikisht më herët dhe tani pohon se dilema nuk është nëse Korridori 8 do të ndërtohet, por vetëm përzgjedhja e trasesë më të përshtatshme. BDI rikujton se Korridori 8 është projekt me rëndësi strategjike për vendin dhe rajonin, i cili lidh lindjen me perëndimin, forcon integrimin ekonomik dhe rrit lëvizjen e lirë të qytetarëve. Mbështetja e Bashkimit Evropian dhe angazhimet e marra në Deklaratën e Tiranës janë dëshmi shtesë se ky projekt është prioritet i padiskutueshëm. Për më tepër, ky korridor nuk ka vetëm dimension ekonomik, por edhe rëndësi të veçantë për sigurinë dhe stabilitetin rajonal, si dhe për zhvillimin e qëndrueshëm afatgjatë”, thonë nga BDI.