Shkup, 19 prill – Bashkimi Demokratik për Integrim (BDI) ka shënuar një precedent të ri në organizimin e saj partiak, pasi për herë të parë në vend, dy nëndegë në Komunën e Çairit janë themeluar me gra në krye të strukturave drejtuese vendore.
Bëhet fjalë për nëndegët “Xhon Kenedi” dhe “Mehmet Gega”, të cilat u themeluan sot përmes kuvendeve zgjedhore të mbajtura në përputhje me Statutin dhe Rregulloren e partisë, ku drejtimi iu besua kandidateve femra, një zhvillim që shihet si hap i rëndësishëm drejt fuqizimit të rolit të grave në politikë dhe vendimmarrje, shkruan gazeta KOHA.
Në nëndegën “Xhon Kenedi”, me votë unanime kryetare u zgjodh Elira Mehmedi, magjistre e drejtësisë dhe profesoreshë në Shkollën e Mesme Profesionale “Arseni Jovkov”. Ajo do të drejtojë strukturën së bashku me nënkryetarin Arben Rahmani dhe sekretarin Hazir Tahiri.
Ndërkohë, për drejtimin e Këshillave Vendorë u zgjodhën Rashit Hasani (KV-1) dhe Blerim Mustafa (KV-2).
Paralelisht, në Fushë Topanë u themelua nëndega “Mehmet Gega”, ku kryetare u zgjodh Vjollca Krivanjeva Husejini, juriste e diplomuar në Universitetin “Shën Kirili dhe Metodi” dhe profesoreshë e lëndëve juridike në shkollën e mesme “Cvetan Dimov”. Në ekipin drejtues janë edhe nënkryetari Fadil Bajrami dhe sekretarja Teuta Shabani.
Nga BDI-Dega e Çairit theksojnë se këto zhvillime përfaqësojnë një moment të ri për përfshirjen dhe avancimin e grave në strukturat partiake, duke e konsideruar këtë si një hap konkret drejt barazisë dhe përfaqësimit më të drejtë.
“Organizimi, uniteti dhe afërsia me qytetarin mbeten themeli i forcës sonë”, thuhet në njoftim, ndërsa drejtuesve të rinj u është uruar sukses dhe angazhim në shërbim të qytetarëve. (koha.mk)