Gjykata Kushtetuese publikoi vendimin e arsyetuar pse rrezoi ngritjen e 11 komisioneve parlamentare në shtatorin e vitit të kaluar. Ky vendim hyn në fuqi një muaj pas botimit në fletoren zyrtare për t’i dhënë kohë parlamentit të ndryshojë rregulloren dhe të zbatojë detyrimet që lindin nga ky vendim.
Ndryshimi i rregullores për të ngritur 11 komisionet parlamentare ishte vendimi i parë i Kuvendit të ri të dalë nga zgjedhjet parlamentare.
Seanca u lajmerua në datë 15 shtator dhe në datën 16 shtator parlamenti zhvilloi dy mbledhje, në të parën futi me procedurë të përshpejtuar rregulloren dhe pak orë më vonë e miratoi.
Por gjykata vendosi që këto vendime janë të paligjshme pasi mbledhja e parlamentit duhet të njoftohet 48 orë para dhe rregullorja nuk mund të votohej para se të kalonte një jave, pasi keshtu e parashikon kushtetuta.
Sipas gjykatës kjo procedurë e ndjekur në thelb ka cënuar demokracinë pasi nuk u ka lënë kohë deputetëve të lexojnë draftin apo të bëjnë propozime.
“Rezulton se është cenuar parimi i demokracisë përfaqësuese, i cili i garanton çdo anëtari të Kuvendit që të ushtrojë, gjatë veprimtarisë parlamentare, të drejtat që burojnë nga statusi i tij kushtetues, i përcaktuar në nivel kushtetues lidhur me lirinë e shprehjes dhe jo vetëm, për shkak se pengimi është evidentuar edhe në drejtim të rolit substancial të pakicës parlamentare për të paraqitur amendamente”, thuhet në vendimin e Gjykatës Kushtetuese.
Deri tani kryetari i kuvendit Niko Peleshi dhe kryetari i grupit parlamentar të PS Taulant Balla kanë hartuar nga një draft për ndryshimin e rregullores.
PD ende nuk ka paraqitur amendamente pasi priste vendimin e gjykates kushtetuese.