Gazetari Arbër Hitaj, i ftuar në studion e QUO VADIS në Vizion Plus foli për dosjen “Partizani”, duke komentuar edhe vendimin e GJKKO e cila thirri dëshmitar në procesin gjyqësor kryeministrin Edi Rama.
Sipas tij nuk ka arsye për mosparaqitje të Ramës nëse kërkohet nga drejtësia. Hitaj shtoi se Rama nuk është thirrur më parë, pasi prokurorët e kanë në dosje gjithçka që iu duhet.
Nga ana tjetër, avokati Leonard Karaj kërkoi më shumë transparencë nga SPAK, duke ngritur pyetje për mënyrën se si përmenden emrat në dosje dhe për standardet e ndjekura në hetime.
Ai theksoi se institucionet duhet të jenë të barabarta në trajtimin e figurave publike, pavarësisht funksionit të tyre.
Pjesë nga biseda:
Hitaj: Rama është thirrur nga pala mbrojtëse e Berishës për ta pasur ballë për ballë. I pari që do shkojë të pyetet është Balla si kallëzues. Çfarë ka ndodhur, në të kaluarën prokurorët e kanë në dosje, prandaj s’e kanë thirrur Edi Ramën deri më tani.
Karaj: Me emër nuk përmendet fare, i referohen vetëm “kryetari i bashkisë”. SPAK duhet të jetë transparent. Pse e përmendin në dosje kryeministri Sali Berisha, ndërsa Ramën vetëm “kryetari i bashkisë”.
Hitaj: Nuk mendoj se SPAK ka frikë nga zoti Rama.
Karaj: Gjithë ditën, madje edhe gjithë natën.
Hitaj: Opozita që ka pasur Rama gjithë këto kohë është SPAK. Nuk është fundi i botës që Rama të shkojë aty. Ka shkuar edhe më parë. Për mua nuk do të thotë asgjë. Për mua shumë mirë bën që thirret. Nuk mendoj se duhet ta refuzojë.
/vizionplus.tv