Gjatë punimeve të Samitit të IV të Diasporës, një mesazh të veçantë përcolli edhe kryetari i Kuvendit të Shqipërisë, Niko Peleshi, i cili u ndal te ndryshimet e shpejta globale dhe sfidat me të cilat po përballet çdo shtet.
Peleshi theksoi se shqiptarët në diasporë janë qytetarë të integruar në vendet ku jetojnë dhe kontribuojnë në zhvillimet e tyre, por njëkohësisht mbartin me vete një “copë Shqipërie” që i shoqëron kudo.
Ai shtoi se Shqipëria ka vend dhe mundësi për të gjithë shqiptarët, duke e konsideruar kthimin e diasporës në atdhe si një narrativë kombëtare që duhet nxitur dhe mbështetur
Niko Peleshi: Bota po ndryshon me shpejtësi, rreziqe të mëdha i kanosen kombeve shteteve si pasojë e ndryshimit të ekuilibrave ndërkombëtarë. Si gjithmonë në histori kohët e ndryshimeve janë edhe kohë mundësish.
Shqiptarët në diasporë janë qytetarë të vendeve ku jetojnë, janë pjesë e natyrshme e zhvillimeve dhe sfidave të atyre vendeve por të gjithë kanë me vete një copë Shqipërie. Ajo Shqipëri herë i ka bërë krenarë, herë i ka mërzitur, por ka qenë dhe do të mbetet gjithmonë aty. Kjo është gjëja më e bukur e çdo shqiptari në diasporë.
Shqipëria ka vend dhe mundësi për të gjithë shqiptarët. Kthimi i diapsorës në Shqipëri duhet të jetë narrativa jonë kombëtare, frymëzuar nga dashuria për Shqipërinë, nxitur nga mundësitë që ofron ky moment historik për Shqipërinë, mbështetur nga potenciali për të ndërtuar një histori suksesi që do ta ndihmonte këtë kombë të përqafonte të ardhmen.