Kryetari i Partisë Demokratike Sali Berisha komentoi Samitin e Diasporës, duke akuzuar kryeministrin Edi Rama si politikanin që ka dëmtuar më shumë kombin shqiptar pas diktatorit Enver Hoxha. Në një komunikim me gazetarët Berisha deklaroi se Rama mban përgjegjësi për shqiptarët, që janë larguar nga vendi gjatë qeverisjes së tij.
“ Nga viti 2015 deri në vitin 2024, vetëm në hapësirën e Shengenit janë larguar 1,990,000 shqiptarë. Së bashku me emigrantët në vende të tjera, janë rreth 45% e popullsisë të larguar nga vendi. Edi Rama është armik i lirisë së shqiptarëve, sepse ai ndërtoi për interesa të pushtetit të tij në Shqipëri narkoshtetin e parë dhe të vetëm në Evropë, duke damkosur në këtë mënyrë Shqipërinë dhe kombin shqiptar”, tha Berisha.
Por kryetari i PD Sali Berisha shfrytëzoi komunikimin me gazetarët për të akuzuar qeverinë “Rama” se ka lënë qytetarët pa mbështetje përballë rritjes së çmimit të naftës.
“E gjithë Evropa, e gjithë bota perëndimore, Australia, janë angazhuar në lehtësime të menjëhershme të barrës fiskale mbi naftën. Në një kohë kur Edi Rama po nxjerr fitime përrallore për shkak të rritjes së TVSH-së dhe nuk ul asgjë, derisa nafta thotë të kalojë 224 lekë për litër”, tha kreu i PD.
Berisha akuzoi kryeministrin se me masat e fundit që po merr po falimenton fermerët.
“Gjermania në një akt para tre ditësh, vendosi të dyfishojë subvencionin e naftës për fermerët. Ta dyfishojë. Të tjerat po kështu, Suedia. Dhe vende të tjera, Suedia uli TVSH-në e ushqimeve në 6%, nga 12% që e kishte. Për shkak të këtyre çmimeve. Kurse Edi Rama hoqi subvencionimin për fermerë shqiptarë dhe shkoi në paturpësinë, pacipësinë më të madhe. U deklaroi 2 metra gënjeshtar, u deklaroi se Evropa nuk e përdor më subvencionin”, deklaroi Berisha.
Berisha u bëri apel qytetarëve që të reagojnë kundër qeverisë e t’i bashkohen protestës së opozitës të premten.