Ka nisur dita e dytë e Samitit të IV të Diasporës. I pari që e mori fjalën ishte ministri për Evropën dhe Punët e Jashtme, Feri Hoxha, i cili tha se historia e diasporës është histori suksesi. Më pas, fjalën e mori kreu i qeverisë shqiptare, Edi Rama.
Në fjalën e tij, Rama theksoi se Shqipëria ka hyrë në një fazë të re sa i përket shtetit të së drejtës, duke deklaruar se pandëshkueshmëria tashmë i përket së shkuarës. Ai u shpreh se drejtësia është e pavarur dhe se askush nuk është mbi ligjin, duke e cilësuar këtë si një moment historik për vendin.
Rama ndaloi gjithashtu te rrugëtimi europian i Shqipërisë, duke kujtuar se dikur vendit i mbyllej dera e negociatave për anëtarësim në Bashkimi Evropian, ndërsa sot janë hapur të gjithë kapitujt, brenda një kohe rekord prej 11 muajsh. Ai e krahasoi këtë rrugëtim me përpjekjet e diasporës shqiptare ndër vite, duke theksuar këmbënguljen dhe sakrificat për të arritur suksesin.
Rama: Sot pandëshkueshmëria është një mit i të kaluarës në Shqipëri dhe sot Shqipëria është vendi ku askush nuk është mbi ligjin dhe drejtësia është e pavaruar siç nuk ka qenë që në krye të herës nga 1912 deri kur ne, me vullnet të plotë, i dorëzuam asaj shpatën që i takon vetëm duarve të saj për të bërë drejtësi të barabartë për të gjithë dhe pa kursyer askënd. Atëherë Shqipërisë i mbyllej rregullisht dera e negociatave për anëtarësim në BE, sot i kemi çelur të gjithë kapitujt e negociatave dhe e kemi bërë këtë për një kohë rekord, vetëm 11 muaj.
Njësoj si ju kur ju mbyllej dera në fytyrë në ato hapa të parë në rrugët e botës dhe kur askush nuk kishte kohë, respekt, nuk kishte besim dhe prandaj nuk kishte as vëmendje për të dëgjuar e kuptuar se sa vlenit, po ju këmbëngulnit dhe pasi shkonit në darkë dhe fshinit lotët nga poshtërimi i ditës riktheheshit në mëngjes për të vijuar të këmbëngulnit duket qenë gati për derën kur të hapej. Edhe Shqipëria këmbënguli dhe ishte gati për derën kur u hap. Ambicia jonë është të mbyllim negociatat në vitn 2027. Në vitin 2030 do ta ulim Shqipërinë si të barabartë mes të barabartësh.