Tirana do të mirëpresë Samitin e Diasporës në datat 13–15 Prill. Kreu i qeverisë, Edi Rama në podcastin e tij “Flasim” theksoi se ky samit do të vërë në qendër historitë e suksesit, punës dhe përkushtimit të shqiptarëve që jetojnë dhe punojnë jashtë vendit, duke i cilësuar ato si histori krenarie kombëtare.
Sipas tij, aktiviteti do të hapet me një ceremoni mirëseardhjeje, ku vëmendja do të jetë jo vetëm te arritjet e diasporës shqiptare, por edhe te kontributi i miqve të huaj që kanë zgjedhur të jenë pjesë e rrugëtimit të shqiptarëve. Rama nënvizoi se ky edicion vjen në një moment të rëndësishëm, pas një përfshirjeje historike të diasporës në zgjedhjet e kaluara parlamentare.
Ai theksoi se synimi i qeverisë është të shkojë përtej lidhjes simbolike me diasporën, duke ndërtuar një rrjet të qëndrueshëm bashkëpunimi që sjell vlerë konkrete për Shqipërinë.
Edi Rama: Në javën që nis nesër, mirëpresim në Tiranë Samitin e Diasporës, edicioni i katërt, që mbledh edhe njëherë shqiptarët nga të gjitha anët e botës, ata që jetojnë dhe punojnë jashtë vendit, por që sytë i kanë në Shqipëri dhe, sa herë u jepet mundësia, mendojnë, komunikojnë apo vizitojnë Shqipërinë.
E nisim më 13 prill me ceremoninë e mirëseardhjes, ku vëmendja do të jetë te njerëzit dhe te historitë e tyre, histori suksesi, pune e përkushtimi, që janë edhe histori krenarie shqiptare anembanë, por, njëkohësisht, edhe një hapje për vlerësim.
Vlerësim, jo vetëm për shqiptarët që kanë arritur dhe kanë kontribuar jashtë, por edhe për miqtë e tyre, miq të huaj që kanë zgjedhur të jenë pjesë e rrugës së shqiptarëve, janë bërë bashkë dhe kanë bashkuar, në një farë mënyre, krahët e shqiponjës sonë.
Sot, diaspora është një forcë konkrete zhvillimi dhe ajo vjen në këtë samit për herë të parë pas një përfshirjeje historike në zgjedhjet politike të vendit. Ajo vjen si një hapësirë e zgjeruar e Shqipërisë përtej kufijve të saj dhe kthehet në një realitet shqiptar në transformim të vazhdueshëm, gjithmonë e më shumë si një partner, si një partner i drejtpërdrejtë, duke filluar nga zgjedhjet politike, pastaj edhe tek ekonomia dhe, hap pas hapi, në rrugët e dijes drejt hapësirave të reja të së ardhmes.
Dhe sfida jonë nuk është vetëm të mbajmë këtë lidhje në një nivël simbolik, por të strukturojmë një rrjet të tërë zëmrash që rrahin për Shqipërinë anëmbanë dhë mendjesh që krijojnë vlerë të shtuar në një bashkëpunim që prodhon rëzultate për vendin dhe jo vëtëm për vetë shqiptarët, kudo që janë.