Qeveria po mendon për një paketë mbështetëse për shtresat vulnerabël, që do të ndihmojë individët në nevojë të përballojnë rritjen e çmimeve për shkak të konfliktit në Lindjen e Mesme.
“Situata është në monitorim të vazhdueshëm nga qeveria, ne jemi në bashkërendim me të gjitha ministritë e linjës për të parë si do të jenë zhvillimet në vijim. Në rast se do të nevojitet që do të ketë ndërhyrje nga ana e qeverisë për të prezantuar paketa ndihmëse për shtresat në nevojë, padiskutim që do t’i marrim të gjitha masat e nevojshme. Edhe vetë rezultatet na e mundësojnë këtë gjë”, tha ministri i Financave, Petrit Malaj.
Ministri Malaj shpjegoi edhe si do të bëhet ulja e akcizës së naftës me 20%, si një mekanizëm për të mbrojtur qytetarët nga çmimet e larta të karburanteve.
“Mekanizmi do jetë i tillë në momentin që bordi do caktojë që çmimi i tregtimit me pakicë do jetë 221 lekë, në atë moment merret vendimi që çmimi i shitjes do jetë 221 lekë minus reduktimin e akcizës 20%, pra do të jetë 213 lekë. Kjo do bëhet me baza ditore, kur çmimi kalon mbi 220 lekë, do kemi një reduktim të çmimit me pakicë me 8 lekë. Kur çmimi do jetë nën 220 lekë, do jetë çmimi që ka përcaktuar Bordi”, tha Malaj.
Gjatë konferencës me gazetarët, Petrit Malaj njoftoi edhe se çmimet e referencave për pasuritë e patundshme për 60 bashkitë e vendit, përjashtuar Tiranën, pritet të jenë gati brenda muajit tjetër.
“Ka një grup pune që ka marrë përsipër të përfundojë procesin brenda prillit. Rishikimi i referencave u shty sepse u vërejtën diferenca mes çmimeve të regjistruara në Kadastër dhe çmimeve që rezultuan nga kontrollet në terren”, tha ministri.
Sa i takon paqes fiskale dhe fshirjes së detyrimeve të prapambetura, dy nisma të hyra në fuqi prej 1 janarit, por për të cilat nuk ka nisur ende zbatimin, qeveria i ka përcjellë aktet nënligjore te ndërkombëtarët, për sugjerime dhe ndërhyrje nga ana e tyre./vizionplus.tv