Deklaratat e kryeministrit Edi Rama se Shqipëria nuk është i vetmi vend ku ekziston korrupsioni sollën dhe reagimin e Sali Berishës.
Në një konferencë për mediat, kryetari i Partisë Demokratike bëri një krahasim me vendet e tjera të Evropës duke e cilësuar Shqipërinë si një lavatriçe të pastrimit të parave.
“Është e vërtetë se vendet e tjera kanë problem drogën, por është po kaq e vërtetë se furnizuesit më kryesorë të kokainës në Evropë janë klanet e drogës të lidhura direkt me Edi Ramën. Nuk ka kryeministër tjetër në Evropë që t’u ketë dhënë trafikantëve miliona e miliona metër katror troje publike. Shqipëria është sot lavatriçja më gjigante e kontinentit e parave të drogës”, tha Berisha.
Kryeopozitari ngriti dhe akuza ndaj ish-zëvëndëskryeministres Belinda Balluku, e cila sipas tij, po përpiqet t’i fshihet drejtësisë nëpërmjet nënshtetësive të tjera.
“Ajo çka mund të informoj unë, të dhëna nga qytetarë digjitalë më pohojnë se Balluku, Lubia është në kërkim të blerjes së shtetësisë dhe pasaportave jo në një, por në disa vende. Përpjekjet e fundit të saj kanë qenë për të blerë pasaportë me investim në Serbi. Pra, Lubi Balluku po përgatitet të blejë shtetësi për të shpëtuar në mënyrë përfundimtare përgjegjësisë para ligjit, pasi ajo ka vjedhur në Shqipëri dhe shpërdoruar miliarda e miliarda euro”, tha Berisha.
Sa i përket protestës kombëtare të radhës, Berisha theksoi se ende nuk është lënë një datë.