“Lindja e Mesme në flakë, sa zgjat lufta?” Kjo është tema e kësaj të marte në QUO VADIS në Vizion Plus.
Analisti politik Endri Tafani, u shpreh se shifrat për mijëra municione të përdorura brenda pak ditësh mund të jenë edhe më të larta nga sa raportohen.
Sipas Tafanit, një përballje mes Iranit, Izraelit dhe SHBA-së ishte e pashmangshme për shkak të dy faktorëve kryesorë, programit bërthamor dhe atij raketor të Teheranit.
Ai theksoi se Irani zotëron aktualisht rreth 3 mijë raketa balistike, duke e cilësuar këtë si një nga arsenalet më të mëdha në botë.
Sipas analistit, pas një lufte 12-ditore vitin e kaluar, Irani ka rritur ritmin e prodhimit deri në 100 raketa në muaj dhe vijon aktualisht prodhimin në fabrikat e tij ushtarake.
Tafani u shpreh se strategjia e Teheranit është të ushtrojë presion ndaj fqinjëve dhe aktorëve ndërkombëtarë, me synimin final për të detyruar nisjen e negociatave me Shtetet e Bashkuara.
Pjesë nga biseda:
Borakaj: 3800 municione në 4 ditë? Është pak?
Tafani: Këto numra janë numri i të goditurave. Më duket pak i vogël. Vetëm ditën e parë 1400 goditje ishin nga SHBA-ja. Që konflikti do të niste, pritej. Lufta e parë ka qenë lufta me Irakun. Një përplasje e mundshme me Izraelin dhe SHBA-në do të ndodhte. Pse ndodhi tani? Ka dy arsye, programi bërthamor dhe ai raketor. Irani ka rreth 3 mijë raketa balistike. Nuk ka asnjë vend tjetër që të ketë aq shumë. Strategjia dhe objektivi i Iranit ishte që të kishte rreth 8 mijë raketa deri në 2027.
Ajo që ka qenë baza e Iranit ka qenë rritja e një arsenali raketor, për ta bërë të pamundur kundërpërgjigjen ndaj tij. Irani, pas luftës 12-ditore vitin e kaluar, nisi të prodhojë deri në 100 raketa në muaj. Dhe tani që ne flasim, po prodhojnë raketa në fabrikat e Iranit.
Irani po godet fqinjët. Kjo është strategjia e tij, ta bëjë jetën e padurueshme për ta, që të nisin negociatat për një bisedë me SHBA-në. Ky është qëllimi i Iranit, të ndikojë te biseda me SHBA-në.
/vizionplus.tv