Imazhet e publikuara nga Varrezat Narellan në Camden, pranë Bondi Beach, kanë tronditur opinionin publik, pasi tregojnë një akt vandalesk të rëndë ndaj varreve myslimane, vetëm pak ditë pas sulmit terrorist vdekjeprurës që ndodhi të dielën. Sipas autoriteteve dhe përfaqësuesve të komunitetit, individë të panjohur shpërndanë koka derri mbi varret myslimane, në një akt që besohet të ketë qenë hakmarrës. Në fenë islame, mishi i derrit konsiderohet i ndaluar dhe i papastër, çka e bën veprimin veçanërisht fyes dhe provokues.
Varrmihësi mysliman Ahmad Hraichie e dënoi ashpër incidentin, duke e quajtur atë çnjerëzor dhe të pakuptimtë. “Kjo është budallallëk i pastër. Nuk arrin asgjë. Vetëm nxit zemërimin, dhimbjen dhe përçarjen. Nuk kemi nevojë për më shumë njerëz që fuqizohen nga veprime frikacake si kjo,” u shpreh ai. Ai theksoi se personat e varrosur nuk kishin asnjë lidhje me ngjarjet e fundit: “Varret janë vende pushimi, dinjiteti dhe respekti – në të gjitha fetë dhe për të gjithë njerëzimin.”. Incidenti ndodhi në një kohë kur udhëheqësit myslimanë të Sidneit kishin refuzuar të mbanin funeralet dhe madje edhe të merrnin trupat e autorëve të sulmit terrorist, një baba dhe djali i tij.
Nga sulmi, deri më tani, kanë humbur jetën 16 persona, përfshirë edhe babain 50-vjeçar të armatosur, ndërsa 42 të tjerë janë dërguar në spital. Policia konfirmoi se 14 viktima vdiqën në vendngjarje dhe dy të tjerë ndërruan jetë më vonë në spital. Viktimat ishin të moshave nga 10 deri në 87 vjeç. 24-vjeçari Naveed Akram ndodhet ende në spital nën mbikëqyrjen e policisë, pasi u qëllua nga oficerët gjatë ndërhyrjes. Udhëheqësi i shquar islam i Sidneit, Dr. Jamal Rifi, deklaroi se komuniteti mysliman nuk i konsideron autorët e sulmit si pjesë të Islamit.
“Ajo që bënë ata nuk tolerohet nga asnjëri prej nesh. Vrasja e civilëve të pafajshëm është e barabartë me vrasjen e gjithë njerëzimit,” tha ai, duke cituar parimet fetare.
Dr. Rifi kujtoi gjithashtu se gjatë rrethimit të Lindt Café në vitin 2014, komuniteti mysliman refuzoi të merrte trupin e autorit dhe të kryente ritualet fetare për të. “Do të bënim pikërisht të njëjtën gjë edhe në këtë rast,” theksoi ai. Edhe Këshilli Kombëtar i Imamëve të Australisë e dënoi fuqishëm sulmin terrorist, si dhe aktet e urrejtjes dhe vandalizmit që pasuan, duke bërë thirrje për qetësi, respekt dhe bashkëjetesë paqësore.