Ish-komandanti i UÇK-së, Xhezair Shaqiri – Hoxha, ka reaguar ndaj protestës së sotme të mbajtur në sheshin “Skënderbeu” në Shkup, duke e cilësuar atë si të zbrazët. Në një postim në rrjetet sociale, Hoxha thekson se UÇK-ja nuk përfaqësohet nga emra apo struktura formale, por nga komandantët, ushtarët, përkrahësit dhe populli. Sipas tij, “kjo është UÇK-ja”.
Ai vë në pah kontrastin mes realitetit të shumë ish-ushtarëve të UÇK-së, të cilët, sipas tij, përballen çdo ditë me vështirësi për të siguruar kafshatën e bukës për fëmijët e tyre.
“Sa e sa ushtarë të UÇK-së përballen çdo ditë me vështirësi për të siguruar kafshatën e ushqimit për fëmijët e tyre, ndërsa këta, para tubimit, po gëksojnë nga verërat e shtrenjta, me ambalazh druri”, shkruan Hoxha.
Komandant Hoxha kritikon gjithashtu përbërjen e protestës, duke theksuar se kishte më shumë persona të veshur kuq e zi sa për të bërë fotografi – selfie sesa komandantë dhe ushtarë të vërtetë të UÇK-së.
Sipas tij, po të kishin arritur t’i bindnin vetëm dy batalione veteranësh, sheshi do të ishte mbushur më shumë se në protestën e sotme, ndërsa pjesëmarrja e një brigade të vetme do t’i kishte mbushur edhe rrugicat përreth.
Protesta e sotme në Shkup, në përkrahje të ish-krerëve të UÇK-së, u kritikua edhe për faktin se, sipas reagimeve në opinion, BDI po e keqpërdor dhe politizon UÇK-në për qëllime të ngritjes së saj politike.