Përplasje mes pushtetit dhe opozitës për ish-kryeministrin në arrati Nikolla Gruevski. Nga foltorja e Kuvendit, gjatë pyetjeve të deputetëve, deputeti Mile Taleski nga LSDM pyeti nëse Ministria e Drejtësisë ka dorëzuar kërkesë për ekstradimin e Gruevskit dhe nëse janë të sakta informacionet se pushteti po përgatit terrenin për ta kthyer ish-kryeministrin, i cili ndodhet në Budapest. Ministri i Drejtësisë u përgjigj se Gruevski ka azil politik dhe se kërkesa për kthimin e tij në vend do të dorëzohet pasi të krijohen kushtet për këtë.
“Këto informacione që kanë arritur tek ne nuk mund t’i injorojmë, përkundrazi, këtu në këtë institucion ligjvënës, para publikut maqedonas, para gjithë opinionit publik, po ju jap mundësinë të deklaroheni dhe do t’ju paralajmëroj të mendoni, të përgjigjeni drejtpërdrejt dhe saktë – a ka dorëzuar Ministria e Drejtësisë kërkesë të re për ekstradimin e ish-kryeministrit dhe të arratisurit Nikolla Gruevski? Dhe pyetja e dytë është: Nëse jo, pse jo, dhe nëse po, kur është dorëzuar dhe tek cili institucion në Hungari”, tha Mile Talevski, deputet i LSDM-së.
“Ministria e Drejtësisë nuk ka asgjë të përbashkët me atë Ministri që kishit ju në kohën tuaj, kur së bashku me Artan Grubin dhe Ali Ahmetin vendosnit se kush ku do të ikte. Kjo Ministri ndjek të gjithë të arratisurit, por ju flisni për azilkërkues politikë, nëse ju kam përcjellë mjaftueshëm. Kjo do të thotë se sa herë që do të krijohen kushtet, Ministria e Drejtësisë do t’i kërkojë sërish dhe sërish qytetarët e vet, ndërsa në ndërkohë duhet të jepni përgjigje se ku janë ata të tjerët me të cilët ju keni negociuar arratisjet”, deklaroi Igor Filkov, ministër i Drejtësisë. /Alsat.mk