Nga 1 janari 2026 hyn në fuqi Ligji për Punësimin e Personave, një rregullore e re që synon të formalizojë punësimin sezonal dhe të krijojë kushte më fleksibile si për punonjësit, ashtu edhe për punëdhënësit. Zëvendësministri i Ekonomisë dhe Punës, Marjan Risteski, e cilësoi ligjin si “revolucionar”, pasi për herë të parë vendos një kornizë të qartë dhe funksionale për angazhimet sezonale, duke synuar uljen e ekonomisë informale dhe rritjen e transparencës në tregun e punës.
Kush përfiton nga ligji i ri?
Ligji u mundëson disa kategorive të qytetarëve të punojnë sezonal pa humbur statusin apo të drejtat aktuale. Ndër ta janë:
Pensionistët, të cilët mund të angazhohen pa humbur pensionin;
Studentët, që ruajnë statusin e tyre;
Të papunët, të cilët nuk e humbin të drejtën për ndihmë sociale;
Të punësuarit, që mund të sigurojnë të ardhura shtesë;
Të vetëpunësuarit, që mund të kryejnë punë shtesë në mënyrë të ligjshme.
Përfituesit mund të angazhohen në tre sektorë kryesorë: bujqësi, hoteleri dhe shërbime.
“Ky ligj është me rëndësi të madhe. Për herë të parë, u mundëson kategorive të ndryshme të punojnë sezonalisht pa humbur përfitimet që tashmë gëzojnë,” deklaroi Risteski.
Regjistrimi me aplikacion mobil
Një nga risitë kryesore është aplikacioni mobil për regjistrimin dhe çregjistrimin e punëtorëve sezonalë në kohë reale. Punëdhënësit do të mund të kryejnë procedurat brenda pak sekondave, gjë që pritet të reduktojë dukshëm punën “në të zezë”.
“Ligji do të intensifikojë luftën kundër punës së paligjshme. Aplikacioni i ri do të sigurojë që çdo punëtor sezonal të jetë i regjistruar dhe i mbrojtur”, theksoi Risteski.
Sa ditë mund të punohet në vit?
Ligji përcakton kufizime të qarta:
120 deri në 180 ditë angazhim sezonal në vit, varësisht nga sektori;
Deri në 15 ditë pune në muaj për secilin punonjës.
Sipas Risteskit, modeli fleksibil synon të ndihmojë bizneset gjatë periudhave të ngarkuara – si sezoni turistik apo ai bujqësor – ndërsa u jep individëve mundësi për të ardhura shtesë pa rrezikuar statusin e tyre profesional apo social.
Efektet e pritshme
Qëllimet kryesore të ligjit janë:
formalizimi i punës sezonale,
ulja e ekonomisë gri,
mbrojtje më e madhe ligjore për punëtorët,
fleksibilitet më i madh për punëdhënësit,
rritja e të ardhurave për individët dhe familjet me të ardhura të ulëta.
Ky ligj pritet të ndikojë dukshëm në tregun e punës duke ofruar një zgjidhje të ligjshme, praktike dhe të sigurt si për bizneset, ashtu edhe për qytetarët.
Zbatimi i tij fillon më 1 janar 2026, njoftoi gazeta Koha.