Ndihmat sociale në Maqedoninë e Veriut kanë hyrë në javën e dytë të muajit pa u lëshuar ende, duke shkaktuar shqetësim të madh tek mijëra familje që mbështeten në këto mjete minimale për mbijetesë. Familjet përfituese raportojnë se janë në ankth të vazhdueshëm, ndërkohë që institucionet nuk kanë dhënë asnjë njoftim zyrtar për arsyet e vonesës.
Aktualisht, mbi 30 mijë familje në vend mbijetojnë përmes ndihmave sociale – një shumë e cila jo vetëm që është tejet e ulët, por konsiderohet ndër më të voglat në mbarë rajonin. Për shumë prej tyre, këto mjete janë e vetmja mënyrë për të siguruar ushqimet bazë dhe mbulimin e shpenzimeve elementare të jetesës.
Situata sociale dhe ekonomike mbetet e rëndë, teksa trendi i ikjes nga vendi vazhdon të rritet. Shumë të rinj deklarojnë se e shohin të ardhmen e tyre jashtë Maqedonisë së Veriut, duke lënë prindërit dhe familjet në një pasiguri edhe më të madhe. Ky largim masiv po krijon një boshllëk të thellë social, ekonomik dhe emocional brenda komuniteteve lokale.
Ndërkohë, familjet që jetojnë me asistencë sociale presin me padurim që institucionet të reagojnë dhe të japin një afat të qartë për pagesat, pasi çdo ditë vonesë u vështirëson edhe më shumë jetesën. Institucionet përgjegjëse ende nuk kanë dalë me një deklaratë zyrtare mbi situatën.
Në kushte të tilla, qytetarët kërkojnë transparencë, përgjegjësi dhe një zgjidhje urgjente për të siguruar që mjetet minimale të jetesës të mos vonohen muaj pas muaji. (INA)