Qeveria bullgare të martën tërhoqi projektbuxhetin për vitin 2026, i pari i hartuar në euro para se shteti anëtar i Bashkimit Evropian të miratojë zyrtarisht monedhën e përbashkët më 1 janar, pas protestave mbarëkombëtare kundër rritjeve të planifikuara të taksave për të financuar shpenzime më të larta.
Qeveria e kryeministrit Rosen Zhelyazkov i kërkoi parlamentit me një deklaratë që ta tërhiqte projektbuxhetin.
“Pas vendimit të parlamentit, qeveria do të nisë një procedurë të re buxhetore,” thuhej në deklaratë. Një komision parlamentar e kishte miratuar projektbuxhetin në lexim të parë më 18 nëntor.
Të hënën në mbrëmje mijëra njerëz protestuan në kryeqytetin Sofje dhe në disa qytete të tjera kundër projektbuxhetit.
Partitë opozitare dhe organizata të tjera thanë se po protestonin kundër planeve të qeverisë për të rritur kontributet e sigurimeve shoqërore dhe taksat mbi dividendët për të financuar shpenzime më të mëdha, si dhe kundër korrupsionit shtetëror.
“Procesi i rishikimit të buxhetit do të jetë i vështirë, me mbikëqyrje të shtuar nga sindikatat, grupet e biznesit dhe publiku,” tha Mario Bikaraski, analist i lartë për Evropën në kompaninë e inteligjencës së riskut Verisk Maplecroft.
“Ka një konsensus të gjerë për nevojën e kujdesit fiskal. Megjithatë, përpjekjet e përsëritura për rritjen e taksave ka të ngjarë të nxisin edhe më shumë tensionet sociale,” shtoi ai.
Rreth gjysma e bullgarëve kundërshtojnë adoptimin e euros, nga frika se do të cenohet sovraniteti kombëtar dhe se shitësit me pakicë do të shfrytëzojnë kalimin nga leva kombëtare në euro për të rritur çmimet.
Javën e kaluar qeveria kishte premtuar ta riparaqiste në parlament planin e shpenzimeve për 2026-n pas protestave të mëparshme në rrugë, duke thënë se do të lejohej më shumë kohë për konsultime me partitë opozitare, sindikatat dhe punëdhënësit.
Zëvendësministri i Punës dhe Politikës Sociale, Ivan Krastev, paralajmëroi të martën se nëse nuk miratohet një buxhet i ri, pagesat për personat që jetojnë nën pragun e varfërisë do të preken, raportoi agjencia bullgare e lajmeve BTA.
“Shpresoj që të gjendet arsyeja e shëndoshë dhe vullneti politik nga të gjithë pjesëmarrësit në proces që të mbrohen grupet më të cenueshme të shoqërisë sonë,” tha ai.